Ithuba elithokozise owoZalo
UMLINGISI woZalo, uSiphesihle Cele, uqokwe njengenxusa lombuthano okuhloswe ngawo ukuhlomisa nokuqwashisa amadoda, iNsika Yamadoda Festival. USiphesihle (osesithombeni), olingisa indawo kaJojo kulo mdlalo, umenyezelwe kwethulwa ifestiveli ngokusemthethweni e-Ekhaya Multi-Arts Centre KwaMashu ngoLwesine ebusuku. Lokhu kwenzeka nje kugujwa inyanga yokugqugquzela amadoda aqotho kuleli. Ephawula ngale ngqayizivele yethuba uSiphesihle uthe ukujabulele ukuba kule nkundla yokucobelelana ngolwazi ngoba naye uyafuna ukudodiswa njengoba ekhuliswe wunina. Umgqugquzeli wombuthano futhi ongumdidiyeli wemidlalo yeshashalazi, u-Edmund Mhlongo, uthe balethe ifestiveli KwaMashu ngoba befuna ukuguqula umqondo womphakathi ngale ndawo.
“Akekho ongayazi ingoma esiyihubo ‘lesizwe’ ethi Ngeke Ngiye KwaMashu, Ngesaba Amavolovolo. Sifuna ukucisha isithombe esibi ngoMashu,” kusho uMhlongo.
Uthe ifestiveli izoqala ngoJulayi 27 iphothulwe ngoJulayi 29.
Okubagqugquzele ukuba basungule umbuthano wukubona igama leNingizimu Afrika lingcola ngenxa yobugebengu obenziwa ngabantu besilisa futhi iningi labo okungabamnyama.
UMfundisi Thomas Radebe, we-Ekhaya Christian Family Church, uthe kuthi uma amadoda etshelwa ukuthi sekudlwengulwe intombazane aqale ngokubuza ukuthi ibifunani ebusuku ngaphambi kokubuza ukuthi ayilimalanga.“Kunomehluko phakathi kwendoda nomuntu wesilisa. Kuyimvelo ukuba wumuntu wesilisa kodwa ukuba yindoda kuyasetshenzelwa.”