Kushiswe isidumbu sobesolwa ngokuloya
UPHITHENE amakhanda umndeni wendoda (76) yaseShowe etholakale ishisiwe ehlathini ngoba isolwa ngokuloya.
UMnuz Jeremiah Mbuyazi wakwaBhekithunga Reserve, eNgodini, kuthiwa utholakale ngoLwesibili olwedlule ebulewe ngemuva kokuduka.
Isidumbu sakhe sitholakale ehlathini sisashunqa. Ubeshe umzimba wonke ngaphandle kwezinyawo ebezingakathungeleki okuyizona abonwe ngazo.
Indodakazi kamufi, uNkk Sibongile Simelane, ithe uyise nonina, uNksz Albertina Ngwenya, bebehleli ngokungakhululeki ngenxa yokusolwa ngomakhelwane ngokuthakatha.
Kuthiwa uNksz Ngwenya uye enduneni, uMnuz Absolom Gwala, wayobika ngokunyamalala kukaMbuyazi ngoba ehambe emini eyolanda imfuyo wangabe esabuya. Uphindelile ngakusasa wayobika ukuthi sekuze kwasa engabuyile umyeni wakhe.
Induna iphume noNksz Ngwenya namadoda endawo bayothungatha uMbuyazi bathola isidumbu sakhe ehlathini sishunqa.
“Umkhulu ubeke washo kumzukulu wakhe ukuthi akazizwa ephephile ngoba kunezinkulumo ezikhulunywa ngomakhelwane. Inkinga isuswe wukugula kakhulu kukababa wakwamakhelwane waze washona. Izingane zakhe zibe sezisola ubaba nomama ngokumthakatha. Zibasabise ngokuthi zizomlandela uyise,” kusho uNkk Simelane.
Uthe ngesikhathi uyise nonina bemtshela ukuthi abasakhululekile ngenxa yezinkulumo zalabo makhelwane wabatshela ukuthi abangakhathazeki ngoba kungenzeka ukuthi izingane zenziwa wubuhlungu bokugulelwa, ziyazikhulumela nje, wayengalindele ukuthi kungagcina kubulawe uyise. UNkk Simelane uthe ngenxa yesimo unina usehlala nezihlobo ngenxa yokwesaba. Uthe noyise ngeke afihlelwe emathuneni asekhaya ngoba banovalo lokuhlaselwa njengoba kusolwa abazali babo ngokuthakatha.
Uthe sebethembe induna namaphoyisa ukuthi yibo abayosiza noma sekufanele balande imfuyo yakubo.
UNksz Simelane uthe baphithene amakhanda ngenxa yokubehlele.
UGwala uthe ukhathazekile ngokubulawa kukaMbuyazi athe kungokokuqala kwenzeka endaweni.
“Ngisola sengathi ngeke kube esokugcina lesi sigameko ngoba laba bantu abebesola uMbuyazi nomkakhe bafuna nomunye ubaba endaweni naye abamsola ukuthi ubethakatha uyise. Bengifisa sengathi amaphoyisa angasheshe abambe labo abathintekayo ngoba kungenzeka siphinde sibone sekwenzeka okunye okufanayo,” kusho uGwala.
Okhulumela amaphoyisa KwaZulu-Natal, uLt Col Thulani Zwane, ukuqinisekisile ukuthi amaphoyisa ayaphenya ngecala lokubulawa kukaMbuyazi.