Kutholwe izimoto ezingu-45 ezebiwe eThekwini
KUVUNDULULWE izimoto ezingu-45 ezebiwe eThekwini, ezitholakale sezidayiselwe amalungu omphakathi.
Okhulumela amaphoyisa KwaZulu-Natal, uLt Colonel Thulani Zwane, uthe uphiko lwamaphoyisa oluphenya ngezimoto ezintshontshiwe belunomkhankaso wokulandela umkhondo wezimoto ezebiwe oqale ekupheleni kwenyanga edlule wasongwa ngoLwesihlanu.
“Umkhankaso uholele ekutheni kutholakale izimoto ezingu-45 okusolakala ukuthi zebiwa ezinye zaphucwa abanikazi bazo. Inani lazo lilinganiselwa ku-R3.5 million kanti zitholwe eThekwini,” kusho uZwane.
Uthe kuboshwe oyedwa kanti kusalindeleke ukuthi sikhuphuke isibalo sababoshwayo njengoba kuqhubeka uphenyo.
Ngesikhathi kunomkhankaso kuthiwa amaphoyisa aqaphele ukuthi iningi lezimoto belinezinombolo ezishintshiwe. Kusolakala ukuthi zidayiselwa amalungu omphakathi.
UZwane uxwayise amalungu omphakathi ngokuthi aqaphele uma ethenga izimoto kubadayisi abazimele iningi lazo elikhangiswa emithonjeni yezindaba ehlukene. UKhomishana wamaphoyisa osabambile esifundazweni, uMajor General Bheki Langa, uncome amaphoyisa ngomsebenzi wawo.
“Sifisa ukuxwayisa abathinteka ekuntshontshweni kwezimoto ukuthi le mikhankaso isizoba khona njalo. Amalungu omphakathi ayaxwayiswa ngokuthi akangazithengi izimoto ezebiwe ngoba ingalo yomthetho ingagcina isifinyelela nakuwo,” kusho uLanga.
Ugcizelele ukuthi amalungu omphakathi ayabazi abantu abaqhuba lobu bugebengu kodwa ayaqhubeka athenga kubona izimoto ngemali encane wathi lokhu kunomthelela ekunyukeni ngamandla kwezinga lokwebiwa kwezimoto.
UNgqongqoshe wezokuThutha, ukuPhepha nokuXhumanisa uMphakathi esifundazweni, uMnuz Mxolisi Kaunda, usishayele ihlombe isenzo samaphoyisa sokuvundulula izimoto ezebiwe.
“Sifisa ukuxwayisa izigebengu ukuthi amaphoyisa nohulumeni babuqaphe ngeso lokhozi ubugebengu balolu hlobo ngoba kuvamise ukuthi kuhlaselwe ngesihluku abanikazi bezimoto. Imikhankaso efanayo izosabalala nesifundazwe sonke ikakhulu eMkhanyakude lapho izimoto zintshontshwa bese zeqiswa umngcele ziyiswe eMozambique.
Sinxusa amalungu omphakathi ukuthi asebenzisane namaphoyisa,” kusho uKaunda.