Idlule nabangu-6 ingozi eyenzeke eMhlanga
KUSHONE abantu abayisithupha engozini eyenzeke ngoMgqibelo ebusuku ngaseMhlanga kutholana izimoto ezimbili.
Ingozi yenzeke emgwaqweni uR102 phakathi kwaseMhlanga nasePhoenix ngo-11 ebusuku. Abayisihlanu bashonele khona lapho oyedwa washonela esibhedlela izolo ekuseni. Okhulumela abezimo eziphuthumayo i-ER24, uNkk Ineke van Huyssteen, uthe kwabashonile kukhona nabashayeli bezimoto ezimbili iSuzuki ne-Astra, abashonele khona lapho. Kukhona nabesifazane abathathu nabesilisa ababili iminyaka yabo bonke ephakathi kuka-25 no-50. Uthe abasindile abebebhajwe emotweni kudingeke ukuthi kusetshenziswe izindlawu bekhishwa. Kubona kukhona nentombazane eneminyaka engu-15 nomfana oneminyaka engu-17, omunye wabo ugcine eshonele esibhedlela.
ULieutenant Colonel Thulani Zwane, okhulumela amaphoyisa KwaZuluNatal, uthe kuvulwe icala lokubulala ngokungenhloso.
“Sithole ukuthi ababili abashonile abebesemotweni i-Astra bangamaNdiya kanti abathathu abebekwiSuzuki ngabamnyama. Amagama abo ngeke adalulwe ngoba akukaxhunywana nemindeni futhi ayikaziwa imbangela yengozi,” kusho uZwane izolo.
Ngesikhathi sokuloba ibingakatholakali imininingwane ngoshone izolo.
Kuphinde kwashona owesifazane kwenye ingozi eyenzeke khona eMhlanga entathakusa yangoMgqibelo.
UZwane uthe kuvulwe icala lokubulala ngokungenhloso emuva kokuba kugingqike iVW Polo umshayeli wayo oboshelwe ukushayela ephuzile ozovela enkantolo namuhla.
UNgqongqoshe wezokuThutha nokuPhepha koMphakathi esifundazweni, uMnuz Mxolisi Kaunda, unxuse amaphoyisa ukuthi awaqaphe kakhulu ngempelasonto ngenxa yokwanda kwezibalo zezingozi.
UKaunda uthe ngale mpelasonto balinganiselwa kwabayishumi abashone ezingozini ezehlukene esifundazweni okubalwa nengozi yaseMhlanga.
Uthe enye ingozi yenzeke kuM7 eThekwini ngesikhathi iloli ishayisana nezimoto ezintathu kwashona oyedwa okungowesilisa oneminyaka engu-30. Kweyenzeke eLadysmith emgwaqweni uN3 kushone ababili kushayisana izimoto kwashona ababili engozini eyenzeke eDundee.
“Kubuhlungu ukuthi abantu bayaqhubeka bayashona emgwaqweni ikakhulukazi ngempelasonto. Konke lokhu kungagwemeka uma abantu behlonipha umgwaqo. Sesandise amaphoyisa ngempelasonto futhi siyawanxusa ukuthi abajezise abaphula umthetho emgwaqweni,” kusho uKaunda.