Badutshulwe bashona okuthiwa bebebabele ukubulala obhejane
AMADODA amabili asolwa ngokuthi abebabele ukubulala obhejane esiqiwini iHluhluwe entathakusa yayizolo adutshulwe ngonogada afa.
Lokhu kwenzeke entathakusa ngo-3.30 izolo. Kuthiwa amadoda abonwe ngonogada bezeMvelo KZN Wildlife abebesebenza eNqolothi, eMfolozi Park.
Ngenxa yokuthi kujwayelekile ukuthi obhejane bahlaselwe entathakusa, nonogada asebeqapha kakhulu ngaleso sikhathi.
Isitatimende esithunyelwe ngabezeMvelo siveza ukuthi onogada bebezama ukuzivikela ngesikhathi bedubula amadoda.
Okhulumela Ezemvelo KZN Wildlife, uMnuz Musa Mntambo, uthe onogada bezwe abantu bekhuluma, babona abayisihlanu behlome ngezibhamu zokuzingela.
“Onogada bakhanyise ngamathoshi, bayalela abasolwa ukuthi babeke phansi izibhamu. Omunye wabasolwa ukhombe unogada ngesibhamu. Ngenhlanhla unogada wadubula kuqala. Abasolwa bashonele khona lapho,” kusho uMntambo.
Amaphoyisa esifundazwe athe abasolwa abathathu baphunyukile kodwa asezithendeni zabo ngoba asebenzisa nezinja ezihogela umkhondo.
Kusolwa ukuthi abasolwa abashonile bebesebenza nabathathu ababoshwe ngesikhathi amaphoyisa nabezeMvelo bephume umkhankaso wokusesha ngoMgqibelo eduze kwasedolobheni iHluhluwe.
Okhulumela amaphoyisa, uLieutenant-Colonel Katlego Mogale, uthe amaphoyisa abone imoto esolisayo iToyota Hilux yaseshwa. Kutholakale izibhamu zokuzingela nezinye izikhali okusolwa ukuthi bezizosetshenziswa ukubulala obhejane. UMogale uthe abasolwa ababoshiwe bazovela namuhla eNkantolo yeMantshi eHluhluwe. Kwababoshiwe kubalwa nomshayeli oneminyaka ewu-44 nababili abehamba nabo.
UMnuz Sthabiso Chiliza oyisikhulu esiphezulu esibambile kwezeMvelo, uthe kuyancomeka okwenziwa ngamaphoyisa nabasebenzi babo ukulwa nokubulawa kobhejane.
“Kuyancomeka indlela abasebenzi bethu abasebenzisana ngayo namaphoyisa. Ukubamba abasolwa abayisihlanu emahoreni awu-24 kuyancomeka kakhulu. Ngiyabahlonipha abenze lo msebenzi. Ngeke siphumule singabatholanga abasolwa abaphunyukile nalabo abasizana nabo,” kusho uChiliza.
AbezeMvelo bathi bawu-142 obhejane asebebulewe KwaZuluNatal selokhu kuqale unyaka.
Seziningi izehlakalo zokuhlaselwa kobhejane eHluhluwe. Kusanda kubulawa abayisithupha izidumbu zabo ezatholakala zidindilizile zikhishwe izimpondo.