Amaciko nemizamo yokusiza uRay Phiri oxinwe wumdlavuza
AMACIKO akuleli azozama ukusiza umculi odume ngokuba ngomunye wabasunguli beqembu iStimela okuthiwa uxinwe ngumdlavuza wamaphaphu.
URay Chikapa Phiri (70), kuthiwa ungeniswe esibhedlela ngenxa yokugula, osekusukumise abanye abaculi abafuna ukulekelela. UMabutho Kid Sithole, umengameli wenyunyana yamaciko, iCreative Workers Union of South Africa, izolo uthe usezwile ngokugula kukaRay.
“Ngizwile ukuthi sekukhona abaculi abafana noMara Louw abazinikele ukusiza uRay. Okwamanje ngisePE, angikasitholi kahle isikhathi sokuthola imininingwane ngokugula kwakhe nokuhlangana nabanye abaculi,” kusho uSithole.
Imibiko yelinye lamaphephandaba eliphuma ngeSonto, uveze ukuthi umndeni wakhe usucele ukuthi uthandaziswe, kulekelelwe nangokumelapha.
URay oke wacula noPaul Simon, ubengomunye wabaculi abebeboshelwe ekhonsathini ye-Africa Day ngoMeyi eGoli nonyaka.
Ungomunye wabaculi abadala abasayibambile kwezikaqedisizungu.
Kuyaqala ukuthi lo mculi axinwe ukugula ngaphandle kokulala esibhedlela ngo2003 emuva kwengozi yemoto okwashona kuyo umkakhe uDaphney. Ukulimala kukaRay kule ngozi okwakukhona kuyo nendodakazi yakhe nabaculi beStimela, kwahlukanisa iqembu elabuye lahlangana.
Ngo-2007 iStimela siqophe iDVD ekhonsathini lokugubha iminyaka engu-25, sibonga nabalandeli ePlayhouse Thekwini. URay uphinde washonelwa wumkakhe wesibili ngo-2015 uPhumzile, obeguliswa yisifo sokushoda kwegazi. Imizamo yokuthola umndeni wakhe izolo ayiphumelelanga kanti zombili izingcingo zakhe bezivaliwe.