Bakhala ngokunganakwa yimeya yeTheku
ABAHLALI baseMjondolo sebesabise ngokuthi bazoqhubeka nokuvala imigwaqo edabula emalokishini akhele iTheku uma iMeya uNkk Zandile Gumede ingazixazululi izikhalo zabo ezethulelwe lo masipala emasontweni amabili edlule.
UNobhala wenhlangano Abahlali baseMjondolo esifundazweni, uMnuz Thapelo Mohapi, uthe izinsuku ezingu-7 ziphele ngoLwesithathu olwedlule ngakho bengabaholi bale nhlangano kubaphoqile ukuthi babuyele emalungwini abo ukubuyisela impendulo.
Uthe imeya ikhombise ukungabagqizi qakala abantu abahlala emijondolo kwazise ayikaze yenze nesitatimende esibaqinisa idolo sokuthi ziyabhekwa lezi zikhalo.
“Sizizwa sengathi sibukelwa phansi thina njengabahlali basemjondolo. Ukwaziswa nje ukuthi izikhalo zethu ziyacutshungulwa, bekungalehlisa ulaka emalungwini ethu. Izinto esikhale ngazo bekukhona nokubulawa kwabantu abahlala emijondolo, okuyinto ebesifuna umasipala ungenelele kuyo kodwa kuze kube manje kucwebe isiziba.”
Uthe ngeke bakwazi ukunqanda amalungu njengoba eseqale imibhikisho ezindaweni eziningi.
“Sizoqhubeka nokulwela esikholelwa kukho kuze kube imeya iyabambisana nathi,” kusho uMohapi.
Ngeledlule abahlali ababebhikisha bavale zonke izintuba ezingenela eCato Crest ngamathayi avuthayo, kwachithwa nemfucuza emigwaqweni. Kulo mbhikisho onodlame oqale ngezintathakusa zangoLwesihlanu, kungqongqiswe nebhasi likamasipala ngomlilo. Ubuholi bale nhlangano buziqhelelanisile nalesi sigameko ngelokuthi amalungu awacekeli impahla uma ebhikisha kodwa avala umgwaqo kuphela.
Okhulumela imeya, uMnuz Mthunzi Gumede, uthe akulona iqiniso ukuthi abazigqizi qakala izikhalo zabahlali basemijondolo. “Ngaphambi kwemashi ebisemasontweni amabili adlule sabiza umhlangano nabaholi kanti sesiphinde sabiza omunye esethemba ukuthi bazovuma ukuhlangana nathi ukuze sixoxe,” kusho uGumede.