Uboshiwe obelethe ingane wayilahla
ZIMKHALELE owesifazane (19) waKwaDabeka okuthiwa ubelethe ingane wayifaka kuplastiki kadoti wayilahla ehlathini.
Okhulumela amaphoyisa, uLt Col Thulani Zwane, uthe lona wesifazane ongumsebenzi wasezindlini uboshwe ngoLwesine ngemuva kokutholakala kwengane ikuplastiki ehlathini.
Kuthiwa omunye umakhelwane uzwe ingane ikhala ehlathini ngesikhathi eya emsebenzini wase ethinta umqashi walona wesifazane embikela.
Umqashi kuthiwa ubevele esola ukuthi lo msebenzi ukhulelwe.
Kuthiwa uxoxe naye wambuza ngengane wavuma ukuthi uyibelethile wayilahla ehlathini.
“Ingane itholakale ehlathini ingagqokile. Kube sekubizwa amaphoyisa ambopha. Lona wesifazane uvulelwe icala lokulahla ingane. Unina wengane, nengane bayiswe emtholampilo okuyilapho abagcinwe khona, bagadwe ngamaphoyisa. Kulindeleke ukuthi avele enkantolo maduzane,” kusho uZwane.
Khonamanjalo, amaphoyisa afuna izihlobo zowesifazane okutholakale isidumbu sakhe sesonakele ehlathini eliseduzane nomgwaqo uNerima, eMariannhill ngoMgqibelo ntambama.
UZwane uthe amaphoyisa awakwazanga ukuqinisekisa ukuthi ushone kanjani.
Uthe amaphoyisa aseMariannhill asaphenya ngokufa kwakhe. Bakholwa ukuthi uphenyo luzoveza ukuthi ubulawe yini.
Umufi ubegqoke amateku, ivesti elimhlophe nejakhethi nama-leggings.
Unxuse labo abanganolwazi nabangasiza ukuthi kutholakale ukuthi ungubani lona wesifazane bathinte uWarrant Officer Phathizwe Maluleka ongaphansi kophiko lwabaseshi eMariannhill ku-071 350 0590.