Liphenduke umhlatshelo ikhansela laseRichmond
UCHAZE indodana yakhe njengomhlatshelo okumele ulethe ukuthula nozinzo uyise wekhansela laseRichmond elibulawe lisendleleni ebheke ekhaya, emasontweni amabili adlule.
UMnuz Thomas Mkhize, onguyise wekhansela laku-ward 2 kuMasipala waseRichmond, uMnuz Sifiso Mkhize(39), uthe sekuyisikhathi sokuthi kuphele ukubulawa kwabaholi kule ndawo.
Ukusho lokhu ekhuluma enkonzweni yomngcwabo wendodana yakhe ezinkundleni zemidlalo iSilahla, eRichmond ngoMgqibelo.
“Namuhla ngizonikela ngendodana yami. Ngithi ngegazi layo akuphele manje ukubulalana. Ngifisa kube elokugcina leli gazi elichitheka ngale ndlela. Ababulali asibabambele gqubu. Noma kungathiwa bayeza kithina njengomndeni bazoxolisa, sizobaxolela,” kusho uMkhize.
Obengumngani omkhulu kamufi, uMnuz Samora Ndlovu ophinde abe nguSomlomo kulo masipala, uthe umngani wakhe ubesezizwa izigi zokufa zimlandela njengoba ubeseke wakuveza ukuthi kukhona abamhlanganisela itulo lokumsoconga.
“Ukuphakamise emhlanganweni wamakhansela ukuthi akaphephile njengekhansela, kukhona abafuna ukumbulala. Sibe sesixoxa njengomkhandlu waseRichmond ukuthi kufanele sikhulumisane namaphoyisa okuyiwona akwazi ukuhlonza ezokuphepha komuntu bese silekelela lapho kudingeka khona ukuqinisekisa ukuthi uphephile,” kusho uNdlovu.
Ugcizelele ukuthi ubengenazo izitha kodwa wathi kukhona abebasola ngokuthi bafuna ukumbulala. Kuvuke umunyu ngesikhathi indodakazi kaMkhize, uNksz Lungiswa Mkhize incoma amagalelo akhe.
“Owenze lokhu, angakutholi ukuthula ngoba usithathele ubaba wasenza izintandane,” kubalisa uNksz Mkhize.
Umphakathi obuphume ngobuningi kulo mngcwabo, ubusho ngazwi linye ukuthi ufe olwembiza ngokulahlekelwa wuMkhize. Phakathi kwezikhulu zikahulumeni ebezihambele lo mngcwabo kubalwa iPhini likaNgqongqoshe wezoBulungiswa kuzwelonke uMnuz John Jeffery, uSihlalo we-ANC esifundeni iMoses Mabhida uMnuz Mthandeni Dlungwane, okhulumela i-ANC KwaZulu-Natal uMnuz Mdumiseni Ntuli, uSihlalo we-ANCYL esifundazweni, uMnuz Kwazi Mshengu nabanye.
IMeya yalo masipala, uMnuz Sibusiso Mchunu, ithe sekuqala ukumxegisa amadolo ukubulawa kwabaholi ngalolu hlobo kule ndawo.
Ushiye emhlabeni inkosikazi yakhe uNomasonto, izingane ezinhlanu, umfowabo nodadewabo, uyise nonina uNkk Esther Mkhize.
Ekhuluma enkonzweni yesikhumbuzo y ebingoLwesine eRichmond, uNgqongqoshe wezokuThutha, ukuPhepha nokuXhumaniswa koMphakathi, uMnuz Mxolisi Kaunda uqinisekise umphakathi ukuthi sekusungulwe ithimba lamaphoyisa eliyisipesheli elisezingeni likazwelonke elizophenya ngokubulawa kwabaholi kulo masipala.
“Kumele sisebenze ngokubambisana ukuqinisekisa ubumbano nokuphepha kule ndawo,” kusho uKaunda.