UMaine uphumele obala ngoSabelo
UMENGAMELI wophiko lwentsha lwe-ANC uMnuz Collen Maine uthi uNobhala we-ANC KwaZulu-Natal uMnuz Thanduxolo Sabelo unamava okuba ngumengameli walolu phiko uma sekuyiwa engqungqutheleni yentsha ngonyaka ozayo.
“Ngiyamnika isibusiso, angaba ngumengameli,” kusho uMaine.
Okhulumela i-ANCYL kulesi sifundazwe, uMnuz Mandla Shange, uthe akukabhungwa ngendaba ethinta ubuholi kulolu phiko.
“Asikho isinqumo esisathathiwe. Kwayena uMaine uke wakhuluma ngale nto,” kusho uShange.
Uthe uMaine noSabelo bayazwana njengoba bengabaholi.
Le ngqungquthela uSabelo (31) angathatha kuyo izintambo kuMaine kulindeleke ukuthi ibe ngoSepthemba ngo-2018.
Omunye wabaholi be-ANCYL esifundeni iTheku, onqabile ukudalulwa, uthe kuningi okungashintsha ngoba uSepthemba usekude.
Uthe uSabelo uyasekwa amagatsha alolu phiko.
“Sisasalelwe unyaka nezinyanga ezimbili ngaphambi kwengqungquthela. Asikwazi ukukhuluma ngo-2018 manje.”
UMaine ngeke akwazi ukuqhubeka nelinye ihlandla njengoba eno-34 ekubeni iminyaka ebekiwe u-35.
Omunye wabaholi uthe uSabelo uzoba ngumengameli olandelayo wentsha.
“Akuyona into esithanda ukuyikhuluma le okwamanje ngoba kuzosuke kumenze ajahe. Kuzokwenza nokuthi abaphikisana naye bamgxeke.”
USabelo ungomunye wabantu abaziwayo ukuthi weseka uMengameli Jacob Zuma noDkt Nkosazana Dlamini Zuma ukuthi athathe izintambo kwiANC ekupheleni konyaka.
Imizamo yokuthola uSabelo izolo ayiphumelelanga, ucingo lwakhe beluvaliwe.