Ayinandaba nokugxekwa inkosikazi kaGugu Zulu
INKOSIKAZI kasaziwayo womjaho wezimoto, uGugu Zulu, owashona eqwala intaba iKilimanjaro nyakenye, uLetshego, ithe ngeke itshelwe ngabantu ukuthi imzilela kanjani umyeni wakhe.
UNkk Zulu ukusho lokhu exoxa neSolezwe ngezinhlelo zakhe zokuqhubeka nabekwenza nomyeni wakhe. UZulu washona ngoJulayi nyakenye beyoqwala intaba iKilimanjaro, okwakuhambisana nomkhankaso wokukhumbula uDkt Nelson Mandela nokusiza umphakathi.
“Ngiyaphindela ukuyoqwala intaba ngoba ngifuna ukuqeda esasikuqalile noGugu. Umthetho wami angiyena umuntu oqala izinto angaziqedi yingakho ngibuyela entabeni.
“Ukuya kwethu entabeni noGugu kwakuwukusiza ukunikelela izingane zamantombazane ezishoda ngamaqakelo. Njengabazali bentombazane kuyasithinta lokhu. Njengomuntu osemehlweni omphakathi, abantu balindele ukungibona ngiqhubeka nemikhankaso ebesiyenza noGugu,” kusho uNkk Zulu.
UNkk Zulu onendodakazi uLelethu (2), uthe uhlanganyele emkhankasweni wamaqakelo ngoba uyazithanda izingane zamantombazane.
Ngonyaka odlule wenza into engajwayelekile esukuma emngcwabeni womyeni wakhe wakhuluma. Wabuye wagxekwa nangokungamzileli ngokufanele umyeni wakhe emuva kokubonakala ohlelweni lwethelevishini esanda kushonelwa.
“Angibanaki abangigxekayo futhi angifuni nangokukhuluma ngokuzila kwami. Wonke umuntu unendlela yokuzila nami nginendlela yokuzilela uGugu. Ngeke ngibanake abakhulumayo futhi ngeke ngitshelwe yibona ukuthi kumele ngizile kanjani,” kusho uNkk Zulu.
Uyavuma ukuthi akulula ukuqhubeka nempilo ngaphandle komyeni wakhe abebengahlukani naye. Usanda kuphumela obala kwelinye lamaphephabhuku ngesikhala esishiywe ngumyeni wakhe obebamba imisebenzi eminingi ngesikhathi esidodwa ukungenisa imali. Uthe ufunde okuningi kumyeni wakhe okwenza naye azibambe ziqine.
“Ngimaze iminyaka ewu-15 uGugu, ngimazi ngisho edonsa kanzima empilweni. Ubengeyena umuntu ofuna ukuhluleka kodwa ubevuka azithathe. Ngifunde lokhu kuyena yingakho nami ngizoqhubeka noma kunzima kanjani.”
UNkk Zulu, ozoyoqwala intaba iKilimanjaro ngoLwesithathu, ubeseThekwini ngempelasonto njengoba engomunye wabasunguli bePop Up Gym esungulwe ngo-2014.
Ubeqala ukuza eThekwini, ulethwe wukuthi kade abalandeli bakhe bemfuna. IPop Up Gym yindlela yokuzivocavoca esigangeni, kudlalwa nomculo.
Uthe inhloso ukukhombisa abantu ukuthi ungazivocavoca noma yikuphi nokulwa nokukhuluphala, ikakhulukazi ezinganeni. Uthe enye yezindlela zokukhumbula umyeni wakhe wukuqoqa izimpahla zakhe nezithombe ukuze indodakazi yakhe yazi ngobuqhawe bakhe.