Semukelwe isiphakamiso se-ANC samaqakelo
SAMUKELIWE isiphakamiso se-ANC sokuthi uhulumeni anikeze abafundi bamantombazane amaqakelo ukuze bangalovi esikoleni uma besesikhathini.
Lesi yisiphakamiso esenziwe yingqungquthela yenqubomgomo ye-ANC ephele ngoLwesithathu eNasrec, eGoli.
UMnuz Buti Manamela obesekomitini elibheka impilo yomphakathi kwi-ANC, uthe amalungu aphakamise ukuthi abafundi besifazane banikwe amaqakelo ukuze bangabi nenkinga uma besesikhathini.
“Kumele banikwe amaqakelo ukuze bakwazi ukukhululeka noma besesikhathini. Lokhu kuzokwehlisa izinga lokulova kwabafundi, iningi labo elingezi esikoleni ngoba lingenawo,” kusho uManamela.
Okhulumela uphiko lwentsha lwe-ANC, uMnuz Mlondi Mkhize, usishayele ihlombe isiphakamiso wathi sizovala igebe lalabo abakwazi ukuzithengethela nalabo bafundi abahlulekayo ukuzithengela amaqakelo.
“Lokhu kuzosiza kakhulu ngoba abafundi besifazane bazobuyelwa yisithunzi. Kunzima zinyanga zonke kubafundi ngoba kudingeka balove ukuze bangabonwa ozakwabo ukuthi abanawo amaqakelo,” kusho uMkhize
UNobhala jikelele wophiko lwabesifazane kwi-ANC, uNksz Meokgo Matuba, naye usishayele ihlombe lesi siphakamiso wathi sizonika inhlonipho amantombazane.
“Siyajabula ukuthi ingqungquthela iphakamise ukuthi abesifazane abancane banikwe amaqakelo uma besafunda. Sizoya engqungqutheleni ngoDisemba sesiyoshayelela isipikili sokugcina kulolu daba,” kusho uNksz Matuba.
UNgqongqoshe wezeMfundo KwaZulu-Natal, uMnuz Mthandeni Dlugwane, waqhamuka nombono wokuthi kusatshalaliswe amaqakelo ezikoleni zesifundazwe.
Umnyango uqale ukunikezela ngamaqakelo ngonyaka wezimali. Wabeka eceleni u-R20 million wokuthenga wona.
Okhulumela uDlungwane, uMnuz Kwazi Mthethwa, uthe umnyango wesifundazwe uhamba phambili ngezinhlelo zokuthuthukisa umphakathi.
Uthe yingakho uDlungwane waqhamuka nohlelo lokuthi kusatshalaliswe amaqakelo.
“Kulo nyaka wezimali sibeke eceleni u-R60 million ngoba baningi abafundi abadinga lolu sizo. Siyajabula ukuthi umbutho wabantu uphakamise ukuthi kunikezwe bonke abafundi amaqakelo,” kusho uMthethwa.
Uthe ziningi nezinye izinhlelo uDlungwane azoqhamuka nazo eminye iminyango engasika kuzo.