‘Ngamanga okushiwo ngoMotshekga’
ISIKHULU soMnyango weMfundo eyisiSekelo uthi ingamampunge imibiko esabalele ezinkundleni zokuxhumana yokuthi abafundi abangazixaki kakhulu ngezincwadi ngala maholidi ngoba ukufunda ngokweqile kubanga umdlavuza wengqondo.
Okhulumela umnyango, uMnuz Elijah Mhlanga, uthe ingamanga imibiko ethi lokhu kushiwo nguNgqongqoshe, uNkk Angie Motshekga.
UMhlanga uthe imibiko iveza sengathi uNkk Motshekga uthe abafundi abazinakekele ngale maholidi baphumule, bangafundi kakhulu ngoba ukufunda ngokweqile kudala umdlavuza.
“UNgqongqoshe akazange asho ukuthi abaphumule bangazithinti izincwadi. Imibiko ingamanga,” kusho uMhlanga.
Uthe uNkk Motshekga uyakugqugquzela ukufunda futhi uhlale enxusa abafundi ukuthi isikhathi esincane abasitholayo kumele basisebenzisele kona. “Uhlale egqugquzela abazali ukuthi bathengele abafundi izincwadi zokuzifundela kunokuthi bathenge amathoyizi. Njengoba kungamaholidi abafundi mabaqhubeke bafunde uma bethola isikhathi njengoba kumele ngosuku bafunde okuthile imizuzu engu-30,” kusho uMhlanga. Uthe kuneminye imibiko ethi uNgqongqoshe ufuna ukusiza labo abangasiqedanga isikole ngokuthi abanike izitifiketi zika-matric. “Eminye yemibiko futhi lena engelona iqiniso ukuthi labo abangaqedanga ukuze bathole imisebenzi bazonikwa izitifiketi zikamatric, uma nje bekwazi ukufunda nokubhala. Azikho izinhlelo zokuthi kuphiwe izitifiketi labo abangenawo u-matric,” kusho uMhlanga. Unxuse amalungu omphakathi ukuthi aqaphele imibiko engelona iqiniso, esabalala ezinkundleni zokuxhumana. “Le mibiko idukisa umphakathi ukuze abantu balahlekelwe yithemba kuhulumeni. Siyayigxeka kakhulu ngoba yenza inhlekisa ezemfundo,” kusho uMhlanga.