Kuhle okuhlongozwa owezeMfundo kodwa...
UMNYANGO wezeMfundo eyisiSekelo uhlela ukulinganisa amazinga adingekayo ekutheni kuphase abafundi emabangeni aphansi, naphakathi nendawo, naphezulu kwaGET – Grade 1 - 9 namabanga aphakeme kwiFET – Grade 10 - 12.
Umnyango ufuna ukulinganisa ngoba abafundi bakwa Grade 10 – 12 behliselwa amazinga okuphumelela ngo-2014 kodwa abafundi bakwa Grade 1 – 9 bangehliselwa.
Isinqumo sasithathwe yithimba elalijutshwe uNgqongqoshe wezeMfundo ngo-2009 ukubheka imfundo ezikoleni. Ilona ithimba elaluleka ungqongqoshe ukuthi amazinga okuphasa ehliswe.
Umnyango uhlela ukuba nenhlolovo ngalolu daba. Izofaka ongoti kwezemfundo, izikhungo zemfundo ephakeme, abazali nomphakathi jikelele, ukuze umnyango ukwazi ukuchibiyela amazinga okudlulisela umfundi kwelinye ibanga, kusuka emabangeni aphansi, naphakathi naphezulu.
Abafundi kwaGrade 10 – 12 baphasa ngo-40% ezifundweni ezintathu, esinye sezifundo makube wulimi lwebele oluvunyelwe uMnyango wezeMfundo futhi bathole 30% ezifundweni ezintathu.
Umbuzo enginawo, uthi, kungabe kwasiza yini ukwehlisa amazinga okuphasa kwaGrade 10 – 12? Kukabili, ngiyazicabangela nje, anyuka amazinga okuphasa kubafundi noma abafundi bathwala kanzima ngonyaka wokuqala enyuvesi noma ekolishi. Ucwaningo lungakhipha into ephelele kulokhu.
Okuhlongozwa umnyango ukuchibiyela emfundweni ephezulu kuGET (Grade 7 – 9) ilokhu okulandelayo:
Phasa izifundo ezine ngo-40%, makube khona ulimi lwebele.
Phasa noma iziphi izifundo ezine ngo-30%.
Isidingo sokuphasa iMathematics ukuze uye ebangeni elilandelayo akuphoqelekile.
Ulimi lwebele kuhlongozwa ukuthi lisuke ku-50% liye ku-40%. IMathematics kuhlongozwa ukuthi yehliswe ku-40% iye ku-30%. KwaGrade 9, umfundi othole ngaphansi kuka- 30% kwiMaths ngeke avunyelwe ukuqhubeka nayo kwaGrade 10, okusho ukuthi uvunyelwe ukwenza iMathematical Literacy.
Iphuzu lesithathu yilona elingehli kahle, yize uMnyango wezeMfundo uthi abafundi abafisa ukuthatha imikhakha edinga iMathematics ngeke bachaphazeleke. Kubuhlungu ukubona umuntu ekhala ethi “ukube ngenza iMathematics ngabe ngiwutholile umsebenzi, ngabe ngiwutholile umfundaze, noma ngabe ngiyangena kulesi sikhungo semfundo ngifundele umsebenzi engiwuthandayo.”
Kumele sikuqonde ukuthi iMathematics iyisihluthulelo semikhakha eminingi esintula kuyo eNingizimu Afrika.
Ukungaphoqelelwa kweMathematics kwaGrade 7 – 9 kuzokwenza ukuthi sibe nabafundi abaningi abazothatha iMathematical Literacy kwaGrade 10 ngoba bazodembesela ekufakeni umfutho ekufundeni iMathematics. Abafundi abazothinteka abafunda ezikoleni ezisemalokishini nezasemakhaya.
Noma ngikhala ngokuhlongozwayo ngeMathematics kwaGrade 7 - 9, ake ngicobelele umnyango nothisha beMathematics ngokuthi singenza kanjani lesi sifundo sithandeke kubafundi.
Uthisha oxhumanisa ngobuciko nobuchule phakathi komhlaba esiphila kuwo neMathematics futhi noxhumanisa izinto ezenziwa kuMathematics nezinye izifundo uyena oyogcina abafundi bejabulile futhi lokhu kuyokwehlisa izinga labafundi abafunda ngokungagxilisi engqondweni .
Buka nje, izimpawu noma izinkomba ndlela ezisetshenziswayo emgqwaqweni iGeometry efundwayo ezikoleni, njengonxantathu, ndingiliza, nxane, nxanhlanu, nxasithupha, olayini, ama-engela nokunye.
Yizwa nje, uma uthisha efundisa i-number line angasebenzisa izingalo nekhanda, isandla sokudla simele ama-positive (+) numbers, isandla sobunxele simele ama-negative (-) numbers bese ikhanda limele u-zero (0) ngoba ikhanda liphakathi nendawo (neutral point). Xhumanisa incwadi engcwele neMathematics. Ake ngithathe amavesi ambalwa eBhayibhelini: Luke 6:29 “Okushaya esihlathini mnike nesinye”, Matthew 5:39 “…..Uma umuntu ekumukula esihlathini sokunene, mphendulele nesinye. Kwi Mathematics, okwenza esandleni sokunxele kwenze nasesandleni sokudla. Izenzo 4:10 “ngegama likaJesu enambethela esiphambanweni”. KwiMathematics isiphambano sisisebenzisa ukudweba nokuhlaziya ama-graphs.
Uthisha makaxhumanise izinto ezenziwa kwiMathematics nezinye izifundo. Lokhu kuzokwenza abafundi babone ukubaluleka kwayo.
UDkt Msizi Mkhize ufundisa i-Accounting e-UKZN