Yikuphi esikwenzayo ukulwa nezidakamizwa?
ISIHLAVA sezidakamizwa esihlasele emphakathini akumele kube yijoka lomuntu othize kuphela kepha sekudinga ukuthi kubanjiswane ukuze inqotshwe le mpi.
Ngendlela izidakamizwa esezimoshe ngayo, sekumele ukuthi uma kuvela lapho zimosha khona noma kuvela labo abazishushumbisayo, sibambisane siwumphakathi ukulwa nakho.
Ngeledlule sibike ngehlazo lapho kuthiwa ababhema isidakamizwa esesibhubhisile eThekwini namaphethelo, sebethaka iwunga nomlotha wabantu abawuntshontsha lapho imindeni igcina khona umlotha wabathandiweyo babo.
Lolu daba lubikwa nje luvukuzwe yi-IFP lwadalulwa ngokhulumela i-IFP kwezokuPhepha koMphakathi, uMnuz Blessed Gwala.
UGwala unxuse uhulumeni waKwaZuluNatal ulusukumele udaba lokusetshenziswa kwezidakamizwa.
Ube esefuna izimpendulo kuhulumeni wesifundazwe ngokuthi usuwenzeni ukuzama ukuxazulula le nkinga yokuhuqwa kwezidakamizwa, ikakhulukazi iwunga.
Yebo uhulumeni kufanele aqhamuke namasu okugwema ukushushumbiswa nokusetshenziswa kwezidakamizwa, uphinde usize nalabo asebehaqwe yilolu bhubhane.
Kepha kufana nokwenza umsebenzi wenkawu ukuthi silindele uhulumeni enze lokhu ekubeni singamalungu omphakathi lapho sihlala khona siyazi imizi okudayiswa kuyo iwunga, insangu nezinye izidakamizwa.
Abantu ababulala isizwe bayaziwa okusho ukuthi zimbili izinto ezingalungile emphakathini.
Okokuqala wukuthi singamalungu omphakathi ancamela ukuziba esikhundleni sokuba qotho sibe nesibindi sibhekane ngqo nenkinga.
Okunye kungaba wukuthi kumele kusolwe amaphoyisa ngokushushumbiswa kwezidakamizwa nokungababophi abathintekayo.
Noma ngabe amalungu omphakathi kawabikanga kepha amaphoyisa kumele azi ngokwenzeka endaweni, kakade aqeqeshelwe ukuphenya. Amaphoyisa aphethwe nguhulumeni, singawukhomba lapho uhulumeni siwusole kepha kumele sizikhombe nathi singumphakathi, sizibuze ukuthi thina senzani ukulwa nalesi sihlava.