Ngeke buze buphele ubugebengu uma kusenje
MHLELI: Izwe lonke likhala ngobugengebu obubhilitile obuhlalise kabi amalungu omphakathi. Into okumele yaziwe ngobugebengu wukuthi abenzi babo ngabantu esiphila nabo lapha emhlabeni.
Kukhona abazali abaziphikelayo izingane zabo ukuthi zenza ubugebengu. Kungagcini lapho bona abazali bahambela izingane zabo ezinyangeni ezidumile ezinomuthi wamacala khona zizowawina. Kwesinye isikhathi bona abazali bakhokhe amademeshe azo izingane zabo. Pho-ke lezo zingane zingayeka kanjani ekubeni zinabazali abazithandayo nabazikhathelelayo? Kukhona izinyanga okuyiwa kuzo, zikhokhelwe khona izigebengu zizoba ngophunyuka bemphethe. Inqobo njena uma zithole imali, azinandaba nomphumela wobugebengu bazo.
Pho-ke ubugebengu bungayekwa kanjani na? Kukhona amaphoyisa akhohlakele (hhayi wonke) asebenzisana nezigebengu ekutheni kubanjwe inkunzi kuhlonyiwe. Kukhona amaphoyisa agwazelwayo khona ubugebengu buzoba yimpumelelo. Pho-ke inkunzi ingayekwa kanjani? Kukhona ojele abashushumbisa izinto beshushumbisele iziboshwa.
Pho-ke ubugebengu bungaphela kanjani? Kukhona amalungu omphakathi ahlala efakaza ngendlela okungeyona khona kuzophunyuka abangani bawo. Pho-ke ubegebengu buzophela kanjani? Kukhona abafundisi abazigqaja ngokuthi basebenzela uNkulunkulu kodwa bebe befihle izenzo zabo zokungcola, abanye bacebile ngokuqola imali yabantu egameni likaNkulunkulu. Pho-ke ubegebengu bungaphela kanjani sekugetshengwa ngisho endlini kaJehova?
Kumanje uMthethosisekelo uvuna izigebengu ezibulala abantu, zidlwengule kubanjwe inkunzi kuhlonyiwe kodwa zibizwa ngabasolwa. Sukiyani-ke yena umsolwa wansondo usenikwa ummeli okuthiwa ngowamahhala noma okhokhelwa nguhulumeni. Lutho lowo mmeli ukhokhelwa yibo njalo abakhokhi bentela.
Pho-ke ubugebengu buzopheka kanjani? Ubugebengu buzophela kanjani ekubeni ngisho nezikhulu zombuso zingaboshwa uma zikhwabanisa imali yabakhokhi bentela? Ingani uma sekutholakele ukuthi isikhulu sezwe sikhwabanisile esikhundleni sokuba sixoshwe futhi siboshwe, sukanini madoda sivese sigixabezwe ngezizumbulu zezigidi zamaRandi ukubonga ukuthi sikhwabanise kahle. Ngakho nezingane ngeke zibusabe ubegebengu ngoba ziyabona ukuthi buyakhokhela. Yisemkhulu Nzimande. EPORT SHEPSTONE