Mabanganxeshezelwa abadla umhlaba wethu
kwalokho kufike osaveya abantu batshelwe ukuthi abasuke kuleyo ndawo sekungeyomlungu.
Kumanje lezo zindawo zilinyiwe, kunamahhotela abelungu babehlukaniselana nje babelana nezihlobo zabo ngendawo yethu. Thina ngapha sidlala ububha asinawo nomhlaba wokulima.
Okubuhlungu kakhulu wukuthi ngenkathi bedla umhlaba bacima nobukhosi imbala. Inkosi eyayisiphethe, uGilibethe kaJongilanga, kaGaduphi, kaMgwabashe, kaNgwane kaVazi yaphucwa umhlaba wayo nengxenye yokugcina yomhlaba osemahhelekehleni eMzimkhulwana.
Baqala izimayini (SimumaDwala-NPC), inkosi yaboshwa nabanumzane bendawo, imfuyo yathathwa yayogcinwa ephawundini. Kumanje singondingasithebeni ekubeni sasinomhlaba owawucebile sizilimela kuwona bathatha konke okwakungamagugu esizwe.
Basihlukumeza impela ngokudla umhlaba wethu futhi kufanele bakhokhe bangancengwa.
Siwumphakathi walesi sizwe samaDunge esathathelwa izwe ngendluzula ngaphandle kwesinxephezelo, siyawuhlonipha umthetho olawula izwe futhi siyojabula uma uphumelela lo ohlongozwayo. Sesilibaziseke kakhulu ngezizathu eziningi. Le yokuthi abakhokhelwe abelungu uma kuthathwa umhlaba angiyizwa kahle ngoba bavele bawabizise amapulazi kube nzima ukuthi athengeke ukuze abuyiselwe kubanikazi bawo okungabantu abamnyama. Yingakho sivuma ngo elethu kulo mthetho ohlongozwayo wokubuyiswa komhlaba ngaphandle kwesinxephezelo.Nabo abasinxephezelanga. Chilizamambuka kaNtshebezimnandi Mdunge EMADUNGENI, KWAGADUPHI