‘Umbiko omuhle uncike kinina’
UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube, ukhwele wadilika ezikhulwini ezibhekele ukuphathwa kwezimali komasipala ezingawenzi umsebenzi ngendlela.
UNkk Dube-Ncube ubekhuluma emhlanganweni nezimeya eziwu-54 ezivela komasipala abehlukene KwaZulu-Natal obuseKokstad ngoLwesihlanu.
Uthe imibiko engenagcobho komasipala besifundazwe incike ekusebenzeni ngokuzikhandla kwalezi zikhulu wathi kungayihlazo ukuthi kube khona abangawenzi umsebenzi ngendlela kodwa baqhubeke nokuthola amabhonasi.
“Ukusebenza kahle kwezimali zikamasipala kuncike kwisabelo sezimali esenziwe ngendlela, safakwa emigudwini efanele. Uma singahlelekile singafaka umasipala enkingeni nomphakathi okumele ubhekelelwe yilowo masipala ngezidingo,” kusho uNkk Dube-Ncube.
Ube esencoma bonke omasipala ngokusebenza ngokuzikhandla ekuphothuleni isabelo sezimali nezinhlelo zentuthuthuko edidiyelwe ngesikhathi esifanele.
Uhlabe ikhwelo lokuthi kuvuselelwe kuphinde kugcwaliswe izikhala zezimenenja zomasipala eseziphelelwe yisikhathi ukuze uhlelo lokusebenza komasipala lungaphazamiseki.
“Sinenkinga yokuba nenqwaba yezimenenja ezibambile komasipala ngesikhathi esibucayi lapho silungiselela ukukhipha isitatimende sonyaka sokusebenza kwezimali. Kuyasixaka ukuthi kungani omasipala belinda inkontileka yezikhulu ezibhekele ukusebenza komasipala ize iphelelwe yisikhathi ngaphambi kokuthathwa kwezinyathelo zokuyivuselela,” kusho uNkk Dube-Ncube.
Ube esenxusa uzinzo nokubekezelelana kwezepolitiki kubona bonke omasipala abakhele isifundazwe.