Unqunyelwe okatiki owezeMpilo
Abasebenzi bezempilo benyunyana iNational Health, Education and Allied Workers Union (Nehawu) banqumele uMnyango wezeMpilo KwaZulu-Natal ugwayi katiki ngokuthi awube nohlelo olucacile lokuqashwa kwabasebenzi abayitoho abasebenza ezikhungweni zezempilo.
Inyunyana inike umnyango izinsuku ezinhlanu ukuthi ulethe uhlelo lokuthi uzobuqeda kanjani ubudlelwano bawo nezinkampani ezinenkontileka yokuqasha abasebenzi okubalwa abaphekayo, onogada nabahlanza izibhedlela.
Lokhu kulandela ukumashela kwabo esibhedlela Inkosi Albert Luthuli Central ngeledlule befuna ukufaka umnyango ingcindezi ukuze ubuyekeze uhlelo lokusebenzisana kwawo nalezi zinkampani. Lesi sibhedlela sikwezisebenzisa lolu hlelo.
UMnuz Ayanda Zulu, onguNobhala weNehawu esifundeni iTheku, uthe bazimisele ngokucela ukuteleka uma uMnyango wezeMpilo ungabaphenduli.
“Izikhalo esizilethe emnyangweni sake saziletha kodwa bangasiphendula yingakho sibanika isikhathi esibanika sona ukuthi beze nezimpenduo ezicacile. Okunye okusinengayo wukuthi sisuke sicele ukuthi uNgqongqoshe wezeMpilo (uDkt Sibongiseni Dhlomo) afike azokwamukela izikhalo kodwa angafiki kanti lezi zinto esikhala ngazo zidinga yena uqobo,” kusho uZulu.
Udaba lokungaqashwa kwabasebenzi abayitoho lube ngundabamlonyeni ngonyaka odlule kuphazamiseka ukusebenza ezibhedlela ezehlukene kulesi sifundazwe ngoba abasebenzi befuna ukuqashwa ngokugcwele.
Okunye abakhale ngakho yizikhala eziningi ezingavalwa okwenza ukuthi abasebenzi abakhona basebenze phansi kwengcindezi.
UZulu uthe kushoda odokotela nabahlengikazi ezibhedlela ngenxa yokungaqashwa kwabasebenzi. Ubalule nokuthi iNkosi Albert Luthuli Central ayisenamuntu ophethe ezokuqasha nokuthi umphathi wezimali wayiswa emahhovisi omnyango esifundazweni.
Okhulumela umnyango, uMnuz Sam Mkhwanazi, uthe balutholile uhlu lwezikhalo zeNehawu wathi bazozibheka baphendule zingakapheli izinsuku ezinhlanu.