Inkinga yeDowns kwiCaf
IMAMELODI Sundowns isenkingeni yabadlali bayo abangeke besayimela kwiCaf Champions League.
ISundowns isizibekisele indawo kuma-quarterfinal eCaf Champions League. Imidlalo yama-quarterfinal iqala ngoSepthemba 8-10 umlenze wokuqala.
Abafana Ba Style yibona abavikela isicoco seChampions League abasidle ngesizini edlule behlula iZamalek.
Njengamanje usuvuliwe uphawini wokubhalisa abadlali emiqhudelwaneni yeConfederation of African Football (CAF).
Amaqembu adlala kwiChampions League nakwiConfederation Cup anelungelo lokubhalisa abadlali abahlanu kule miqhudelwano njengoba sekungenwa kumaquarterfinal.
Abadlali beSundowns abebebolekisiwe bazokhuza ibuya kuleli qembu kuleli sonto. Abebebolekiswe emaqenjini agijima esigabeni esikhulu nguCuthbert Malajila, Mogakolodi Ngele, Mario Booysen nonozinti uThela Ngobeni. UKudakwashe Mahachi yena kubukeka ezodlala kwiLamontville Golden Arrows abebolekiswe kuyona.
ISundowns ngeke isakwazi ukubhalisa uNgele, Malajila, Ntuli noBooysen ngoba bonke sebedlalile emiqhudelwaneni yeCaf kule sizini.
UMalajila noNgele bebedlala kwiBidvest Wits ebiyibambe kwiChampions League. IWits isiphumele obala ngokuthi ngeke ibabuyise ngoba bamba eqolo. Leli phephandaba lithole izindaba zokuthi umqeqeahi weSundowns uPitso Mosimane unesifiso sokugcina laba badlali ababili.
Uma uMosimane ethatha isinqumo sokubabuyisa ngeke esakwazi ukubabhalisa kwiChampions League ngenxa yokuthi abadlali abavunyelwe ukumela amaqembu amabili ngesizini eyodwa.
UNtuli naye usesimeni esifanayo nesikaNgele noMalajila.
Lo mgadli odabuka KwaZulu-Natal ubeyibambe kwiPlatinum Stars ngesizini edlule ebidlala kwiConfederation Cup.
ISundowns ithwale kanzima kula masonto adlule ngesikhathi kulimele abanye abadlali okukhona kubona uKhama Billiat, Sibusiso Vilakazi, Wayne Arendse noLeonard Castro.
UTeko Modise obevamise ukungena ngesiwombe sesibili afike ashintshe umdlalo uhambile kuleli qembu. Omunye umdlali ongekho kwiSundowns kulezi zinsuku nguWayne Sandilands.
Inkontileka yakhe neSundowns iphele ekupheleni kukaJuni. USandilands udubile ukujima kuze kulungiswe indaba yekusasa lakhe kwiSundowns.
UNgobeni obebolekiswe kwiFree State Stars kungenzeka abuyiselwe ukuzovala isikhala sikaSandilands.
AmaBrazilians asele nonozinti ababili kwiChampions League okunguDenis Onyango oyisethenjwa sawo noKennedy Mweene.