UBooth ucacisa ngofanelwe wukuba yiphini likaStuart Baxter
OWAYENGUMDLALI wasemuva weBafana Bafana, uMathew Booth, usephumele obala wathi umqeqeshi uStuart Baxter kufanele aqoke inkakha yakuleli ewine izindebe yadlala naphesheya kwezilwandle njengephini lakhe eqenjini lesizwe.
UBaxter ongumqeqeshi omusha weBafana, oqashwe ngemuva kokuxoshwa kuka-Ephraim “Shakes” Mashaba, akakaliqoki iphini lakhe. ISouth African Football Association (Safa) imnikeze ilungelo lokuziqokela iphini afuna ukusebenza nalo. Ngesonto eledlule, kuvele ukuthi nguShaun Bartlett owayegijima kuCharlton Atletic yaphesheya kwezilwadle ongase agixabezwe ngalesi sikhundla.
UBooth, owawina isicoco seligi kabili neMamelodi Sundowns, udlale iminyaka eyisikhombisa eRussia emaqenjini okukhona kuwona iRostov.
“Empeleni iSafa angazi ukuthi kungani yathatha isikhathi eside ukuqoka uBaxter, manje sekuthathwa esinye isikhathi ngesikhundla sephini,” kusho uBooth.
“UBaxter udinga ukuqoka iphini ebelingumdlali, hhayi wakudala kakhulu. Kudingeka umuntu abadlali abasamkhumbula, odlale phesheya kwezilwandle, wawina izindebe. Udinga umuntu ozokwazi ukugqugquzela abadlali ngesikhathi umqeqeshi egxile emaqhingeni omdlalo.”
Kubadlali bakuleli abebeyibamba eminyakeni edlule abadlale phesheya kukhona uMacbeth Sibaya owawina iligi neRubin Kazan yaseRussia noBenni McCarthy okunguyena yedwa eNingizimu Afrika owawina indebe ye-Uefa Champions League neFC Porto. UMcCarthy usanda kuqokwa njengomqeqeshi weCape Town City eshiywe ngu-Eric Tinkler.
UBooth ubengomunye wezinkakha ebezikade zihambele umqhudelwano waminyaka yonke wowayengumdlali we-Orlando Pirates, uSiyabonga Sangweni, iSiyabonga Sangweni Youth Festival & Mayoral Sports Day esongwe izolo eDondotha, eMpangeni.
UMashaba uqhamuke nesitayela esingajwayelekile kuleli lapho obeyiphini lakhe u-Owen Da Gama ekade engumqeqeshi weqembu lika-Under 23. Iphini likaDa Gama bekungumqeqeshi ka-Under 20, uThabo Senong obesizwa ngopheka elika-Under 17, uMolefi Ntseki.
“Ngangiluthanda uhlaka lukaMashaba lokuba nabaqeqeshi abasebenza ngokuxhumana. Kodwa mina ngifisa ukuthi amaphini amaqembu esizwe aqashwe ngokugcwele,” kusho uBooth.