‘Khohlwa wokuningi ulwele impumelelo’
OWAYEYINJINI ye-Orlando Pirates, uWilliam “Naughty” Mokoena, udonse ngendlebe umdlali omusha weqembu, uThamsanqa Sangweni, ukuthi kufanele akhohlwe yizinto eziningi azozifica eqenjini kodwa alwele impumelelo.
USangweni umenyezelwe njengomdlali omusha wePirates ngesonto eledlule esuka kwiChippa United. Unengcindezi yokuzakhela igama kweZimnyama njengomfowabo uSiyabonga ogaxe amakhokho emgibeni ekuqaleni kwesizini edlule. UThamsanqa, oyibamba enkabeni yenkundla, uzobe engaqali ukudlalela iqembu elikhulu kwazise kumasizini amabili usayiniswe yiMamelodi Sundowns esuka kuMaZulu kodwa izinto azangamlungela kahle kumaBrazilians nokuphethe ngokuthi abolekiswe kuChilli Boys amasizini elandelana.
UMokoena ubephakathi kwezinkakha ebezihambele umqhudelwano waminyaka yonke iSiyabonga Sangweni Tournament and Youth Celebration esongwe izolo eDondotha, eMpangeni.
“Into engiyithanda kulo mfana wukuthi uqinile. Kule ndawo ayidlalayo udinga umuntu oqinile onesineke. Lo mfana unenhliziyo njengomfawabo,” kusho uMokoena.
“Isiyalo sami kuyena, kufanele abhekise ikhanda phansi. Kudingeka alwe, angabheki ukuthi ubani uthini, ubani wenzani. Kufanele alwe. Uma engadlala kahle emidlalweni ewu-10 yokuqala angabizwa eqenjini lesizwe ngoba ayikho into angenayo. Ngiyaziqhenya ngokumbona egqoke ijezi lePirates.
IPirates iqede isizini ka-2016/2017 ngaphandle kwendebe. Lokhu kwenzeke ngesikhathi abalandeli bethembile ukuthi bazovala isizini ngenjabulo iPirates ifinyelela kowamanqamu weNedbank Cup kodwa amathe abuyela kwasifuba behlulwa yiSuperSport United ngo 4-1 eMoses Mabhida Stadium.Lokhu kusho ukuthi eZimnyama aziyitholanga inkomishi yokubhiyozela iminyaka ewu-80. Akubuzwa ukuthi ngesizini ka-2017/2018 ingcindezi izohlala kubadlali abasha nomqeqeshi uKjell Jonevret osekuvele kukhona abalandeli abangasayizwa indaba yakhe.
“Engikuthanda ngoThami wukuthi unesibindi, angaya noma yikuphi afike adlale, kunoma yiliphi iqembu. Yikho ngithi ngeke kube nzima kuyena ukudlala kwiPirates. Ngiyazi ukuthi abantu balindele izinto eziningi kodwa kufanele bamnikeze ithuba,” kusho uMokoena.