Ujima ne-Arrows ongadlali kwi-Downs
UBUYELE ejimini yeLamontville Golden Arrows umdlali ebimboleke kwiMamelodi Sundowns, uKudakwashe Mahachi, okuvela ukuthi umqeqeshi wamaBrazilians akamdingi.
UMahache waseZimbabwe, ubebolekiswe kwi-Arrows ngesizini edlule wayisiza yaqeda endaweni yesikhombisa ku-log ye-Absa Premiership. Ungomunye wabadlali beSundowns abaphila ngokugcogcoma emaqenjini ePremiership. UMahachi akakaze ayithole indawo okungeyakhe eqenjini leSundowns ngaphansi kobuholi bomqeqeshi uPitso Mosimane kusukela asayina inkontileka yeminyaka eyisihlanu ngo-2014 kuleli qembu esuka kwiBantu Rovers yaseZimbabwe. Ngaphambi kokubuya kwamaqembu emaholidini, imenenja kaMahachi, uMike Makaab, ikuqinisekisile ukuthi lo mdlali uzobuyela kwiSundowns njengabo bonke abadlali bayo abasuke bephuma ekubolekisweni. Isolezwe lihoshe ukuthi uMosimane akayizwa kahle ekaMahachi obekubhekwe ukuthi azovala isikhala esivuleke ngemuva kokuhamba kukaKeagan Dolly oseyibamba eFrance.
Iphini lomqeqeshi we-Arrows, uMandla Ncikazi, likuqinisekisile ukuthi uMahachi usebuyile kuBafana Bes’thende.
“UMahachi ubuyelile kwiSundowns njengoba besikade simbolekile. Izingxoxo zokuthi adlale kithina ngesizini ezayo ziyaqhubeka kodwa uzobe eziqeqesha nathi ngoba sikhathazwa ukuthi kwiSundowns akajimi nesikimu esikhulu. Ngakho umthatha ufice ukuthi akekho esimeni sokuthi angaqala ukudlala. Sinethemba lokuthi kuzoqedwa konke agcine elapha kithina. Udaba lusezithebeni zabaphathi kodwa nginesiqiniseko sokuthi uzogcina kithina,” kusho uNcikazi.
Ngaphandle kukaMahachi, i-Arrows kusafanele ifongqe isigqoko kwiBidvest Wits ukuze ithole umgadli uKnox Mutizwa waseZimbabwe ebimboleke maphakathi nesizini edlule wafika wenza omkhulu umehluko kuBafana Bes’thende ebashayela amagoli abalulekile. Ibhekene nesimo esifanayo ngomdlali wasemuva uNkosinathi Mthiyane ebimboleke kwi-Orlando Pirates.
I-Arrows isivele ihlukene nomgadli waseMalawi uChuikepo Msowoya ohlulekile ukuzinza kwiArrows. Unozinti uRichardo Goss kuvela ukuthi usayine kwiReal Kings edlala kuNational First Division .
“Bakhona abadlali esibabhekayo. Siyadinga ukuqinisa phambili. Uzokhumbula ukuthi uMutizwa besikade simbolekile kuWits, nakhona sisaxoxisana nabo ukuthi siyamthola yini noma asimtholi. Kodwa nginethemba lokuthi uzobuya,” kusho uNcikazi.