Umqansa ohlalele iCell C Sharks kweyeSuper Rugby
ICELL C Sharks iyona kuphela emaqenjini aseNingizimu Afrika adlulele kumaPlay Offs eVodacom Super Rugby ebukeka izoba nomdlalo onzima njengoba kwenzekile ngesizini edlule iya eNew Zealand.
I-Emirates Airlines Lions neDHL Stormers eyabo imidlalo izoba sekhaya. ILions izodlala eGoli, iStormers ibe seKapa.
Nakuba kusasele umzuliswano owodwa (ngempelasonto ezayo) kweyamaqoqo ozocacisa ukuthi la maqembu azodlala nobani kweyomkhumulajezi kodwa akukho okusazosusa iLions esicongweni elandelwa yiSharks ku-Africa Confrence 2. Kuzoba yinto efanayo nakumaStormers adle iqoqo kusasele inyanga ukuthi kuqedwe imidlalo.
Ngokomthetho womqhudelwano, kuzothi uma kuqedwa eyamaqoqo bese kuqala eyomkhumulajezi ezobe ibunjwe ngamaqembu amahlanu aseAustralia naseNew Zealand bese kuba amathathu ase-Afrika okuyiLions, Stormers neSharks.
Nakuba kungakacaci ukuthi yimaphi amaqembu azobhekana neLions neStormers eGoli naseKapa kanjalo neSharks kodwa umqansa wala maqembu womabili ubukeka ulula kakhulu uma uzowuqhathanisa nalo obhekene nowoShaka bona okumele bawine ekuhambeni.
Lesi simo sifana ncamashi nesangonyaka odlule lapho iSharks ibimelwe ukuyodlala neHurricanes egcine idle umhlanganiso njengoba ivikela isicoco. Ngalelo langa iSharks idlale kahle kodwa isimo sezulu ebesiyinkinga kuwona womabili amaqembu kubukeke sengathi sithwalisa kanzima amaSharks.
Okungafanele kwenzeke wukuthi iStormers ingavumi ukushayelwa ekhaya njengoba kwenzekile ngesizini edlule ikhishwa kabuhlungu kungalindelekile. Nephutha leLions lokuthambisa isikimu emdlalweni wokugcina akufanele uJohan Ackermann nethimba lakhe labaqeqeshi baliphinde.
Yize kubukeka kunzima kwiSharks kodwa umqeqeshi wayo uRobert du Preez uzwakala engenavalo.
“Ngesikhathi siqoma ukudlala umbhoxo sasifuna izinsuku ezifana nalezi. Kuhle ukunqoba embhoxweni kodwa kwehla kahle uma unqobe lapho ubungalindelekile khona,” kusho yena sakuqhosha.
Kusenjalo, iSaru ikuqinisekisile ukuthi iToyota Cheetahs neSouthern Kings amaqembu azoshaywa ngesithende kwiSuper Rugby ngoba sebefuna ukuyibuyisela kwiSuper 15. Kuthiwa avolontiyile athatha imali kanti asezozama kumaligi aphesheya kwezilwandle.