Ezithinta umjaho iDundee July

IHHASHI elizodla umhlanganiso kulo nyaka kwiDundee July, lizohamba nemali engu-R570 000. Lokhu kuvezwe uMthobisi Makhathini okhulumela uMnyango wamaSiko namaCiko, KwaZulu- Natal.

Uthe umcimbi walo nyaka uzoqala ngoLwesihlanu lapho kuzoba nohambo emigwaqweni yaseDundee.

“Ngo-9 ekuseni ngoLwesihlanu kuzohanjelwa amalokishi ahlukene kukhonjiswa ngamasiko ahlukene. Kuzoyiwa eSithembile, Glencoe Town, Forestdale nasePeacevale kunxuswa abantu ukuthi baye emjahweni,” kusho uMakhathini.

Uthe ngoMgqibelo kuzoba nemijaho eyisishiyagalombili yamahhashi nokuzothi owodwa kuwo kube ngowabesifazane.

“Maphakathi nemijaho kuzobe kukhonjiswa ngemfashini ehlukene ethungwe ngabathungi bendawo. Neminye imicimbi yobumnandi ehambisana nalo mjaho iyoqala ngoLwesihlanu,” kusho uMakhathini. Uma sekugoqwa umcimbi uthe kuyoba nedili lomculo elibophele abaculi abadumile. “Abantu bayozitika ngomculo. UNgqongqoshe walo mnyango, uNkk Bongi Sithole-Moloi, uthe uthemba ukuthi ngomcimbi kuzozuza kakhulu abantu abazobe bedayisa nezindawo zokulala kwabasuka kude,” kuchaza yena.

Uthe ngalo mcimbi nje sekukhona izinhlelo zokufundisa intsha ngokunakekela amahhashi.

Kubaculi abazonandisa kuNoma Khumalo, Mfezemnyama, Mokotjo, Andile KaMajola, Zandre, DJ Mngadi, DJ Gukwa, Duncan, DJ Happy Gal, Naima Kay, Babes Wodumo, Tzozo, Bullistic, DJ Nko, Sosha, Sgwili nabalingisi beSibaya.

UPhumlani Dube owayengumsakazi uzokhuluma nabantu abahlukene ngendlela abazobe begqoke ngayo ehamba kukhaphethi obomvu.

Isithombe: SITHUNYELWE Isithombe: INSTAGRAM DJ HAPPY GAL THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza...