Isililo ngokushona kobeneqhaza kwiSoul Brothers
IZINGWAZI zomculo wombhaqanga iSoul Brothers zikhala ezimathonsi ngokudlula emhlabeni kweciko elabamba iqhaza empumelelweni yeqembu, uBethuel “Ngubs’ Ngubane.
Umsunguli woGandaganda BaseNingizimu Afrika (okuyigama okuteketiswa ngalo iSoul Brothers) uMoses ‘Black Moses’ Ngwenya uthe bafe olwembiza ngokushona kukaNgubane (61) njengoba ebewumgogodla futhi kunguye obehlelela leli qembu imicimbi kuleli. Umufi ushonele esibhedlela iCharlotte Mxeke eGoli ngoMgqibelo ngemuva kokungeniswa khona exinwe yizinso. “Siqale ukusebenzisana naye kusukela ngeminyaka yo-1980. “Uyena obesihlelela imicimbi, eyofaka nezikhangiso kulezo zindawo ebesisuke sizocula kuzo. “Khona silimele kakhulu,” kusho uBlack Moses. UBlack Moses uthe beyiSoul Brothers bazobe beduduza izithameli ngezingoma zabo emngcwabeni kaNgubane ozobe usoBanjeni eMthunzini ngalo Mgqibelo kusukela ngo-9 ekuseni.
Okhulumela umndeni kamufi uMnuz Paul Zikhali uthe uNgubane ubesenesikhathi egula kodwa ehamba nakho.
“Ubephromotha imicimbi futhi abuye aphrojuse abaculi okukhona kubo nomculi we-Afro soul uBerita nabakamaskandi,” kusho uZikhali.
Uthe namhlanje kuzoba nenkonzo yesikhumbuzo eKopanong Hall, ekhoneni likaLuthuli noMain Street eDobsonville eSoweto.
Enye ingwazi ekhale ezimathonsi ngokushona kukaNgubane, yimbongi uMzwakhe ‘The People’s Poet’ Mbuli ethe inhliziyo yayo ibuhlungu futhi akuvumi ukuba ikwamukele ukuthi leli qhawe alisekho njengoba libe namagalelo amakhulu emculweni wakuleli.
UNgubane usebenze kakhulu nezinkampani okubalwa kuzona o-EMI Music, Tusk MusicneBMG Records.
UNgubane wabuye wasebenza kakhulu nabaculi okubalwa kubona uLucky Dube naMahotella Queens.
Ngaphandle kwalokho ubebuye anikele ngezinsimbi emingcwabeni yosaziwayo okukhona kubo uLucky Dube, David Masondo kanye nabanye abaningi.