Abeneme ngombiko wophenyo
ABAHOLI bamabandla esimanje abeneme ngombiko wophenyo ngabefundisi obuwenziwa yiKhomishini eVikela iNkolo, Izilimi namaSiko.
Umbiko wethulwe izolo nguSihlalo wekhomishini uNkk Thoko MkhwanaziXaluva (osesithombeni) emahhovisi abo eGoli.
Ububhekwe ngabomvu njengoba kwaqala uphenyo ngamabandla ahlukene ngo-2015. Okuseqhulwini kulo mbiko wukuthi makube nekomiti elizolawula abefundisi ukuze abaphula umthetho baphucwe amagunya. Umbiko uphakamisa ukuthi ikomiti alihlanganise nabanye abefundisi. UNkk Mkhwanazi-Xaluva uthe abefundisi bayacanasa ngoba awukho umthetho obalawulayo.“Yikomiti elingaqeda lezi zinkinga. Kumele sazi ukuthi abefundisi benzani, kuphi ukuze balawuleke,” kusho uNkk Mkhwanazi-Xaluva.
Ugcizelele ukuthi abaqondile ukulawula inkolo kodwa bafuna ukukhalima abaholi abadukisayo.
Uthe kuningi akufundile, okunye okumshaqisile ngezinto ezenzeka emabandleni.
“Siyabonga nokuthi abanye abaholi basihloniphile. Bakhona abebecabanga ukuthi ngokubathumela amasamanisi bekuhloswe ukuthi bahlukumezeke.”
Umbiko uphothulwe ngonyaka odlule, wadluliselwa ePhalamende ngale nyanga.
Abaholi bamabandla banikezwe umbiko nyakenye ukuze benze izincomo kuwo.
UNkk Mkhwanazi-Xaluva uthe konke sekulele ekutheni iPhalamende liyazamukela yini izincomo.
“Uma iPhalamende lizamukela zinjengoba zinjalo izincomo, kuzoba nomehluko omkhulu kwezenkolo. Udaba alusekho kithina, abafuna ukuphonsela umbiko inselelo bangaya enkantolo.”
Okunye okuvezwe umbiko ukuthi maningi amabandla angabhalisiwe ngokusemthethweni. Kuvele nokuthi alukho uhlelo eMnyangweni wezaseKhaya olunikeza abefundisi bokufika imvume uma bezovula amabandla. Kuphakanyiswe ukuthi ubufakazi obenziwa ngabathi basinde emabandleni buthathwe njengezikhangiso bulawulwe yi-Advertising Standards Authority. Kuphakanyiswe nokuthi imikhiqizo edayiswa amabandla kumele ilawulwe umnyago wezokuhweba nezimboni. AbakwaSouth African Revenue Service kuthiwa kumele baphenye amabandla angayikhokhi intela. IKhomishini ifuna ukuba nalo lonke uhlu lwabefundisi bakuleli.
UNkk Mkhwanazi-Xaluva uthe ngaleli sonto uzobhalela uNgqongqoshe wamaphoyisa, uMnuz Fikile Mbalula ukulandela ngamacala abawavulele abefundisi kusukela ngo2015.
Uthe amaphoyisa ahudula izinyawo ngala macala yingakho kungangcono uma kungenelela ikomiti abaliphakamisayo.
Izincomo zekomiti zithinta wonke amabandla akuleli.
UMbhishobhi Samuel Ndlovu, okhulumela i-Alliance of Pentecostal and Charismatic kuzwelonke, uthe bazowuphikisa umbiko.
“Uma kumele siye enkantolo sizokwenza njalo. Sanikezwa umbiko wesikhashana safaka izincomo ezingazange zisetshenziswe. Asikho isidingo somthetho omusha ngoba ikhona eyezwe. Akuwona umsebenzi wabefundisi ukulandela abaphula umthetho kodwa imithetho ibekelwe lokho,” kusho uNdlovu.
Kwabavela kwikhomishini kubalwa noDkt Hamilton Nala ihhovisi lakhe elithe ngeke liphawule lingakawuboni umbiko. Kwaphenywa noPastor Mbhoro, Pastor Penuel Mnguni wodumo lwezinyoka noweDoom uLethebo Rabalao.