Ulanda ngosizi oshonelwe engozini
UPHUNDLEKILE owesifazane waseMatendeni, eNanda, oshonelwe ngamalungu omndeni wakhe amathathu engozini yemoto edlule nabayisithupha eMhlanga ngoMgqibelo.
Umfowabo kaNksz Philisiwe Ntuli (30) omncane osindile engozini ulele egunjini labagula kakhulu esibhedlela. Engozini uNksz Ntuli ushonelwe wunina uNkk Noxolo Ntuli (49), udadewabo uLungile (28) nobakekazi uNksz Mathoza Ntuli (42). Imoto ibishayelwa nguNksz Thabile Ndebele (42) wakwa G eNtuzuma okuthiwa ubengumngani omkhulu womndeni wakwaNtuli.
“Usisi Thabile sisonta naye sonke koFakazi baKaJehova, ubengumngani omkhulu kamama. Bekugula ugogo ekhaya eNdwedwe, usisi Thabile wazinikela ukuthi uzobahambisa ngemoto yakhe ayobonwa. Bamfakele upethroli bahamba, kwasala mina nomfowethu omncane. Ngishaqekile sengizwa ngengozi,” kuchaza uNksz Ntuli.
Uthe kusaduma ikhanda nokuthi kuzokwenziwa njani ngamalungiselelo omngcwabo ngoba noyise akasekho, unina ubengasebenzi. Utshele iphephandaba ukuthi umndeni wakhe ubusubuya eNdwedwe ngesikhathi kwenzeka ingozi emgwaqweni uR103 phakathi kwaseMhlanga nasePhoenix. Uveze ukuthi uzwile ukuthi kushone namalungu omunye umndeni kodwa abakazi ukuthi kwenzekeni ngoba nomfowabo omncane u-Akwande usesimeni esibucayi esibhedlela.
Usebeke ithemba lokuthi asinde umfowabo ngoba usesele naye nomunye omncane, obengayanga eNdwedwe.
Bayisihlanu abashone endaweni yengozi okuhlanganisa nababili abakade bekwenye imoto.
ULungile, obengeniswe esibhedlela elimele kakhulu, ushonele khona ngeSonto ekuseni.
UNgqongqoshe wezokuThutha nokuPhepha koMphakathi KwaZulu-Natal, uMnuz Mxolisi Kaunda, udlulise amazwi enduduzo emindenini eshonelwe. Ukhale ngokwanda kwezingozi ezenzeka ngezimpelasonto wathi sezize zaphoqa ukuthi bandise amaphoyisa. Unxuse umphakathi ukuthi uqhubeke nokushayela ngokucophelela, nokuthi amaphoyisa angabahlekeli abaphula imithetho yomgwaqo.
Ngesikhathi sokuloba ungqongqoshe ubesathumele ithimba elizohlangana nemindeni mayelana nezinhlelo zomngcwabo. Kusaphenywa nangembangela yengozi.
Okhulumela abezimo eziphuthumayo kwa-ER24, uNkk Ineke van Huyssteen, uthe ingozi yenzeke ngezithuba zabo 11 ebusuku bangoMgqibelo.