Ukhuthaza intsha owahlukunyezwa ngokocansi
USEBENZISA isimo esamhlukumeza ukunika intsha ithemba nesibindi sokuxoxa ngezimo ezinzima edlule kuzona owesilisa owahlukunyezwa ngokocansi esemncane.
UMnuz Ndumiso Ngidi (30) onezinhlelo ezigxile ekuthuthukiseni intsha usebenzisa isimo adlula kusona ukukhuthaza intsha ukuze ibhekane nezinkinga.
UNgidi, ongumcwaningi weHuman Sciences Research Council (HSRC) eMgungundlovu, wayeneminyaka eyisishiyagalombili ehlukunyezwa ngokocansi ngowesilisa owayesondelene nomndeni wakhe ngo-1995.
“Kwakusanda kushona ubaba ngihlala nomfowethu. Sasingahlali namuntu omdala ngoba umama washona nginonyaka. Ngolunye usuku ngathintwa ngendlela engeyiyo ngowesilisa owayesondelene nomndeni wami wagcina ngokungihlukumeza ngokocansi,” kusho uNgidi.
Lokhu kwenzeka kanye ngoba yena nomfowabo bathathwa yizihlobo kodwa kwamshiya ehlukumezekile.
Akakwazanga ukutshela umndeni wakhe ngalesi sigameko. Uthe wayazi ukuthi okwakwenzekile akulungile kodwa wayengazitsheli ukuthi kuwukuhlukumeza ngokocansi. Uze waqala ukukhuluma ngako ngokukhululeka ngo-2012 esexoxa nentsha njengengxenye yezinhlelo ayezenza nayo kwi-MAC Fellowship.
Wayeqwashisa intsha ngegciwane lengculazi nokunye okuthinta intsha.
UNgidi, owenza izifundo ze-PhD kwezeMfundo nezeNtuthuko e-University of KwaZulu-Natal, uthe ngesikhathi ekhuluma nentsha wathola ukuthi baningi abake bahlukunyezwa ngokocansi futhi kunzima kubona ukuthi bakhulume ngakho. Ngenyanga edlule ubengesinye sezikhulumi engqungqutheleni yentsha efunda ezikhungweni zemfundo ephakeme i-HEAIDS Conference lapho ekhulume esidlangalaleni ngokukhula kwakhe nomthelela okube nawo ekutheni abe lapho ekhona.
Uthe kunzima kwabobulili bonke ukukhuluma ngokuhlukunyezwa ngokocansi kodwa kunzima kakhulu kwabesilisa ngenxa yendlela abakhuliswa ngayo. Ubalule ukuthi nakuyena kuba nzima ukukhuluma ngesimo adlula kuso ngoba kuba sengathi usiphila kabusha njalo uma exoxa ngaso kodwa unethemba lokuthi ukukhuluma kusiza abanye.
Ngokusho kwakhe abantu besilisa bakhula betshelwa ukuthi kufanele baqine nokuthi akufanele bakhale nokwenza kube nzima ukuthi bakhulume ngezinto ezibahlukumezayo.
Uthe usegxile ekutholeni izixazululo zezinkinga ezibheke nentsha.“Sekudingeka kutholakale izisombululo zalezi zinkinga nokuyikho engigxile kukho manje. Ezinye zezisombululo kufanele kube ukuxoxisana nentsha yesilisa ukuze ikhulume ngokuhlukunyezwa ngokocansi,” kusho uNgidi.