Usewutholile umbiko wekhomishini
INGCABHA isikuMengameli Jacob Zuma ukuthi anekele izwe ngokutholwe yikhomishini embikweni wayo emuva kokuphenya ngemfundo yamahhala.
Okhulumela ikhomishini, uMnuz Musa Ndwandwe, uthe yize bengeke basho ukuthi umbiko sebewuhambisile kuZuma noma abawuhambisanga kodwa benze konke obekulindelekile kubona baphothula yonke into ekupheleni kukaJuni.
UNdwandwe uthe iJaji uMnuz Jonathan Heher nguyena ozoxhumana noZuma mayelana nombiko.
“Konke thina ebesibekelwe ukuthi sikwenze sikwenzile. Umbiko sawuphothula manje sekuphakathi kwejaji noMengameli. UMengameli ngokomthetho angawunekela izwe umbiko noma angawukhiphi, konke kulele kuye,” kusho uNdwandwe.
Uthe kodwa ngendlela umphakathi owulangazelele ngawo umbiko unethemba lokuthi uyokhishelwa izwe.
Izinhlangano zabafundi ezehlukene zamashela ekomkhulu e-Union Buldings, ePitoli, ePhalamende kanye nasekomkhulu le-ANC eLuthuli House zifuna imfundo yamahhala.
Kwezinye izikhungo kwashiswa impahla abafundi beteleka befuna imfundo yamahhala.
Ingqungquthela yemigomo ye-ANC ebiseNasrec eGoli inqume ukuthi kuqalwe ngokushesha ngayo.
IPhini likaNgqongqoshe emnyangweni wezemfundo, uMnuz Mduduzi Manana, lithe uma kuthiwa imfundo ayiqalwe ngonyaka ozayo ngeke bangabaze ukwenza lokhu.
UManana uthe ungomunye wabantu abayilwela wathi ufisa ngabe isiqaliwe.
“Kumele ngabe isikhona, kwamina ngalwa kakhulu siyifuna ngisewumfundi. Sivumelene sonke engqungqutheleni ye-ANC ukuthi kumele ngabe kade yaqala,” kusho uManana.
Uthe balinde umbiko wekhomisini ozosho ukuthi iziphi izindlela ezizosetshenziswa ukuyikhokhela.
Uthe ziningi iziphakamiso eziphumile ngokuthi ingaxhaswa kanjani.