Umnyango wakha ubudlelwane nezinkampani
UMNYANGO weMfundo ePhakeme usuqale umkhankaso wokuhambela amabhizinisi amakhulu uwanxenxa ukuthi awamukele abafundi abaqhamuka emakolishi amakhono, ama-Technical Vocational Education and Training (TVET).
Umnyango unxenxa la mabhizinisi ukuthi anike isipiliyoni abafundi ukuze baqasheke ikakhulu emikhakheni yamaartisan ashoda kakhulu kuleli.
Izolo iPhini likaNgqongqoshe kulo Mnyango uMnuz Mduduzi Manana (osesithombeni) uhambele kwaToyota eProspecton lapho ebeyohlangana nabaphathi bale nkampani ukuze kwakhiwe ubudlelwane bokuqeqesha abafundi.
“Siyazi ngenye yezinkampani ezinkulu kuleli ngakho asilindele ukuthi ingathatha abafundi abangu-30 000 ibaqeqeshe ngoba kwayona inezinye izinhlelo eziseceleni ezenzayo zokuqeqesha abafundi. Zikhona nezinye izinkampani esizihambele singqongqoza sakha lobu budlelwano,” kusho uManana.
Ngonyaka izwe likhiqiza ama-artisan angu-15 000 kodwa kudingeka angu30 000 ngonyaka ngokwezinhlelo zomgomo wokuthuthukisa izwe, i-National Development Plan. “Usuqala ukushintsha umbono obukhona wokuthi abafundi basemakolishi izinkampani azithandisisi ukubathatha kodwa manje sebeyathathwa. Ezinye bezikhala ngokuthi asisondeli kuzona sizofuna usizo, yingakho sesinalobu budlelwano nezinkampani ezinkulu ukuze abafundi bathole isipiliyoni.”UMengameli wakwaToyota, uMnuz Andrew Kirby, uthe lobu budlelwane nomnyango namakolishi kuzobasiza beyinkampani.
Uthe bazokwenza umehluko ezimpilweni zabafundi bakulesi sifundazwe abazothola amakhono. “Sikhona ukuze sisize intsha nabantu bakulesi sifundazwe bathole amakhono. Sizosebenzisana ngoba ama-artisan ayadingeka kuleli.”