Amaphoyisa axoshe amaphara ahlala kujantshi wesitimela eBerea
KUPHELILE ngamaphara ahlala ngaphansi kukajantshi wesiteshi sesitimela eBerea, eThekwini, emuva kokuthi amaphoyisa kaMasipala weTheku ehambisana nakahulumeni egasele kule ndawo awasusa.
Amaphara athuthelwe ezikhungweni ezigcina abangenamakhaya.
Sekuphele iminyaka emihlanu amaphara engaphansi kukajantshi, aqala ehlala eduze kwerenke yamatekisi ase-Eastern Cape, kwathi uma esuswa ngosomatekisi angena e-Albert Park, uma esuswa khona ayozifihla kujantshi wesitimela.
Esitatimendeni esithunyelwe nguNksz Tozi Mthethwa oyiNhloko yezokuXhumana kuMasipala weTheku uthe amaphoyisa agasele kujantshi wesitimela ngenhloso yokususa amaphara.
“Sihambe namaphoyisa kahulumeni, akaMasipala weTheku, abakwaMetrorail nezinye izinhlaka ezithintekayo ukususa amaphara.
“Amaphoyisa aphinde akhuculula nezindawo ezithathwa njengezigcwele ubugebengu eThekwini futhi azoqhubeka nokugasela kuzona,” kusho uNksz Mthethwa.
Uthe angaphezu kuka-30 amaphara asusiwe kujantshi wesitimela kwasuswa nezithiyo akade ezibekile.
Lezi zithiyo bezingaphazamisa ukuhamba kwezitimela nabagibeli bezitimela.
USenior Superintendent Sibonelo Mchunu okhulumela amaphoyisa kaMasipala weTheku osabambile uthe amaphoyisa azogasela ezindaweni ezinobugebengu obuningi ukuze izakhamizi zihlale ziphephile.
“Sizimisele ukwenza iTheku indawo ephephile, ehlanzekile lapho izakhamizi zizohamba ngokukhululeka. Ukuhlala eduze kukajantshi wesitimela kuyingozi kumaphara, kwingqalasizinda nakubagibeli besitimela,” kusho uMchunu.
Uthe baqale ekuseni ukukhuculula leya ndawo kwaze kwaba semini beqinisekisa ukuthi amaphara ayasuka kujantshi.
Uveze ukuthi bazoqhubeka nokusukumela phezulu uma abantu bebanga umsindo eThekwini, bekhala ngabahlala emgwaqweni namaphara alala ngaphandle kwamabhizinisi eThekwini nalabo abachama esidlangalaleni.
Imeya yathembisa ukuthi amaphara azokwakhelwa isikhungo sokufundisa ngamakhono.