Usizwe wukuzifisa kuhlaselwa e-tavern
UTHUKA izanya owesilisa osinde ngesikhathi abasolwa bevulela ngenhlamvu bebhekise kwabebezihlalele endaweni yokucima ukoma, eseNtembisweni ngaseGreytown, ngeSonto ebusuku.
Kulesi sigameko kushone amadoda amabili amagama awo angakadalulwa, kuze kube kukhulunywa nemindeni.
Umthombo okhulume neSolezwe, obewuhambisana nomunye wabashonile uthe bebephuma odwendweni obelukwesinye isigodi.
Uthe badlule endaweni yokucima ukoma ngenhloso yokushaya iziphuzo ezimbalwa ngaphambi kokuthi baqhubeke nendlela.
“Ngesikhathi sisahleli kungene umlisa othile waphinde waphuma ngokushesha. Babuye sebebabili, abazange besabuza lutho bavele bavulela ngenhlamvu bebhekise kumufi. Baphendukele kuwona wonke umuntu osendlini. Ngiziwise phansi samuntu odubulekile,” kusho umthombo.
Uthe bekungazange kube khona ngxabano nabahlaseli.
Uveze ukuthi oyedwa wabashonile ubengahlali endaweni, ubesebenza eThekwini.
Ubephuthuma ukuyolungiselela ukubuyela emsebenzini.
Okhulumela amaphoyisa KwaZulu-Natal uColonel Thembeka Mbhele uthe: “Abesilisa ababili bashonele endaweni yesehlakalo kwathi oyedwa waphuthunyiswa esibhedlela elimele kabi. Kuvulwe amacala amabili okubulala nelilodwa lokuzama ukubulala esiteshini samaphoyisa saseMatimatolo. Imbangela yalokhu kuhlasela ibingakaziwa, amaphoyisa ayaphenya.”