Ithemba ngokwelapha isifo se-gonorrhoea
UMGOMO wokuvikela i-meningitis kungenzeka ube nomthelela ekuvikeleni isifo esithelelana ngokocansi nesingezinye zezifo zocansi ezidlangile emhlabeni i-gonorrhoea.
Lokhu kuvele emiphumeleni yocwaningo olusanda kukhishwa kwiThe Lancet oluthinta abantu abangu-14 000 baseNew Zealand.
Lo mgomo owaziwa ngeMeNZB wakhelwe ukuvikela i-meningococcal group B infection – okuwuhlobo lwe-meningitis oluyingozi.
Ngokusho kwabacwaningi kungokokuqala ukuthi kube nomgomo okhombisa ithemba lokuvikela i-gonorrhea.
Ngokwezibalo zenhlangano yezempilo iWorld Health Organisation (WHO), balinganiselwa ku-78 million abathola i-gonorrhoea emhlabeni wonke unyaka nonyaka. I-WHO isanda kuveza ukuthi lesi sifo asisazweli emishanguzweni ekhona yokuselapha.
Ngokusho kukaDkt Teodora Wi weWHO, amagciwane adala i-gonorrhoea anezindlela zokumelana nemishanguzo nokwenza igcine ingazweli. “Amagciwane adala i-gonorrhoea akhaliphile. Njalo uma sisebenzisa imishanguzo emisha ukuyelapha, igciwane liyashintshashintsha lenze izindlela zokumelana nayo.”
Imiphumela izosisiza ekutheni kutholakale umgomo wokuvikela lesi sifo ikakhulu njengoba sesingazweli kweminye imishanguzo yokuselapha.
Uma singalashiwe singaholela ezinkingeni eziningi okubalwa kuzo ukuthikameza inzalo. Siphinde sibeke abantu engcupheni yokuthola igciwane lengculazi.
Njengoba abantu abasha bengabanye balabo abasengcupheni yokuthola lesi sifo. Uma kungaqinisekiswa ukuthi kutholakala imiphumela efanayo kweminye imigomo ekhona esetshenziselwa ukuvikela i-meningitis kungasho ukuthi ukunika abantu abasebasha lo mgomo kungabanomthelela ekwehliseni izibalo zabantu abangenwa yilesi sifo – ikakhulu njengoba sekunenkinga yokuthi singazweli emishanguzweni.
Abacwaningi bathe okwamanje bekungakabi bikho umgomo osuke wahlolwa wakhombisa impumelelo ekuvikeleni i-gorrnohoea yize lesi sifo sikade saba khona.
Mine imigomo esihlolwe yaze yafika esigabeni esiphezulu sokuhlolwa kodwa kuyona awukho ophumelele. Yize lezi zifo zinezimpawu ezingafani futhi zingena ngendlela engafani kubantu – kukholakala ukuthi kukhona okufanayo ekwakhekeni kwegciwane elizakhayo.
Kulolu cwaningo abacwaningi basebenzise iminingwane ngabantu abaneminyaka ephakathi kwengu-15 no-30 ababetholakale benezifo zocansi i-gonorrhoea ne-Chlamydia emitholampilo. Laba bantu bebevela ezikhungweni ezingu-11 ezelapha izifo zocansi, kubhekwe nokuthi babesohlwini lwabantu ababengakwazi ukunikwa umgomo owaziwa ngeMeNZB phakathi kuka2004 no-2006. Bathole ukuthi iningi lalabo ababethole lo mgomo bebesethubeni lokuba ne-gonorrhoea uma kuqhathaniswa nalabo abangawutholanga.
Ukunikwa lo mgomo bekwehlisa ngo-31% amathuba okuthola i-gonorrhoea.
UDkt Helen Petousis – Harris wesikhungo semfundo ephakeme i-University of Auckland, eNew Zealand obehola lolu cwaningo uthe imiphumela abayitholile ikhombisa ukuthi kukhona umehluko omncane ngenziwa wumgomo wokuvikela i-meningitis ekuvikeleni abantu ukuthi bangayitholi igonorrhoea.
“Kungokokuqala ukuthi umgomo ukhombise izimpawu zokuvikela i-gonorrhoea. Okwamanje akukazeki kahle ukuthi yini edala lokhu kuvikeleka kodwa lemiphumela ingasiza emizameni yokuthola imigomo engavikela i-meningitis ne-gonorrhoea,” kusho uDkt Petousis – Harris.