Basaba eyokuhhewulwa kukaZuma
IPHINI lesibili likaNobhala Jikele we-SACP uMnuz Solly Mapaila lithe babhalele i-ANC becela ukuthi ingamthumeli uMengameli Jacob Zuma ukuthi azokhuluma nezithunywa engqungqutheleni ese-Boksburg, Ekurhuleni, eGauteng, ngenxa yokusaba ukuthi uzohhewulwa yizithunywa njengoba kwenzeka emgubhweni wabasebenzi beCosatu.
UMapaila uthe i-ANC mayithumele usekela Mengameli we-ANC uMnuz Cyril Ramaphosa ukuba ayimele kule ngqungquthela.
UNobhala jikelele we-SACP uDkt Blade Nzimande (osesithombeni) uphinde waveza ukuthi ngeke bazimele noma bangene ukhetho bengamakomanisi kodwa bazoqhubeka nokuhlala kumadlelandawonye.
“Asifuni uMengameli ahhewulwe ngabantu yingakho sicele ukuthi kuthunyelwe omunye umuntu. Siphinde sakhetha ukuthi singazimeli okhethweni ngoba izinqumo ezinjena kumele sizidingide namalungu ethu kanti abone kungcono ukuthi sime kancane. Ngeke sibushintshe kakhulu ubuholi uma sesikhetha abazophatha,”kusho uNzimande.
Uthe isizathu sokungashintshwa kobuholi wukuthi ubudlelwano bamadlelandawonye (ANC,SACP and Cosatu) buntekenteke njengamanje kanti ukushintsha ubuholi be-SACP kuzodala umonakalo omkhulu.
IPhini likaNobhala Jikelele we-SACP uMnuz Jeremy Cronin limemezele ukuthi ngeke lillungenele ukhetho lokuhola esigungwini esiphezulu sale nhlangano ngoba lifuna ukuphumula.
UNzimande uthe naye uyafisa ukuphumula njengo-Cronin kodwa okwamanje ngeke akwazi ukuhoxa esikhundleni sakhe.