Bathembisa ukubuya nezindondo
LITHEMBISA ukubuya nezindondo kuyo yonke iminxa ithimba lothisha nabafundi eliyomela iKwaZulu-Natal (KZN) emcintiswaneni wokonga amanzi.
Umncintiswano, oqale ezingeni lesifundazwe, wenziwa wuMnyango wezaManzi nezeNhlanzeko ukukhuthaza ukongiwa kwamanzi njengoba kunesomiso. Ziyisihlanu izikole zamabanga aphansi ezivela esifundeni uMgungundlovu ezihambe izolo ukuyomela isifundazwe emncintiswaneni ozoba seBenoni, eGauteng.
UNkk Zandile Zitha, omunye wothisha abahambe nethimba, uthe bazobuya ngoJulayi 13 futhi bayangabaza ukuthi bazobuya belambatha.
“UMnyango wezaManzi neNhlanzeko waqala umncintiswano ngenxa yokubona inkinga yesomiso. Kufakwe izinhlelo ezikoleni ukuze umyalezo wokongiwa kwamanzi udluliswe yizingane ngobuciko.
“Sibe nenhlanhla ukuthi izikole zethu zenze kahle kusukela kusaqala umncintiswano njengoba sesiyomela isifundazwe,” kusho uNkk Zitha.
Phakathi kweminxa okuyoqhudelwana kuyo kubalwa iCreative Poetry, iPraise Poetry, iDrama, iPoster nomculo.
Abamele isifundazwe kwiCreative Poetry yiPanorama Primary, kwiCraze Poetry kukhona iKhethindlelenhle Primary, kwiDrama yiKopsville Primary, kwiPoster yi-Open Gate Special kube yiNobanda Primary emculweni.
Kukhona noNkk Thabile Mbhele ozomela othisha, ozobe ethula inkulumo ngokongiwa kwamanzi. Wakhethwa ukuthi amele ozakwabo besifundazwe kuzwelonke emuva kokuba ehlabe umxhwele ithimba ebelijaja ezikoleni.
Izikole ezizowina umunxa ngamunye zizothola u-R20 000, zakhelwe neMedia Centre bese kuthi emunxeni wothisha kuwinwa u-R50 000.
UNkk Zitha uthe akulona ithuba abalithatha kancane ukuhamba nabafundi kulolu hlelo ngoba kuningi abazobuya nakho.
“Ngaphandle kokuncintisana esikuhambele, abafundi bazofundiswa ngokongiwa kwamanzi, bavakashiswe nasezindaweni zamanzi ezehlukene. Lokhu sikuthatha njengokufunda ngoba abafundi bayadinga ukufundiswa ngesomiso esibhekene naso.”
Uthe umncintiswano waqala ngoMeyi 26 ezingeni lesifunda. Izikole eziphume phambili zadlulela kowesifundazwe obuseVerulam ngoJuni 7.