Imibuzo ngoMvikeli woMphakathi
SEKUQUBUKE imibuzo ngokuthi ukulungele yini ukuba sehhovisi uMvikeli woMphakathi u-Advocate Busisiwe Mkhwebane osolwa ngokugxambukela ezindabeni ezingamthinti nokuhlulwa wumthetho.
Amaqembu aphikisayo asephakamise ukuthi ehle esikhundleni u-Adv Mkhwebane.
Usolwa ngokugxambukela ngemuva kokuphakamisa ukuthi kushintshwe umthethosisekelo.
Kusabatshazwa lokho uphinde waphakamisa ukuthi iBhange loMbuso kumele linqindwe amandla okwenza noma yini kubhekwe nemithetho elisebenza ngayo.
Isazi somnotho nezomthetho, uSolwazi Bonke Dumisa, sithe kade sabona ukuthi uMvikeli woMphakathi akacabangisisanga ngaphambi kokukhipha umbiko wakhe ngeBhange loMbuso.
“Bekungafanele u-Adv Mkhwebane agxambukele ezindabeni zokushintshwa koMthethosisekelo nezomnotho ngoba akukho okubi okwenziwa yiBhange loMbuso. Akwenzile kuntengise irandi futhi washeshe wadedela umbiko ngaphambi kokufundisisa kahle umthetho. Angimangali uma esethi akanawo amandla okutshela iPhalamende ukuthi alilinqinde amandla iBhange loMbuso,” kusho uDumisa.
Umhlaziyi wezepolitiki ozimele, uSolwazi Bheki Mngomezulu, yena akaliboni iphutha ku-Adv Mkhwebane. Uthe i-DA ne-EFF akumele balalelwe ngoba njalo uma kukhona into eyenzekile lowo osuke ethinteka bahlale bethi kumele ehle esikhundleni.
Omunye umhlaziyi wezepolitiki, uMnuz Thabani Khumalo, uthe kusukela angena ehhovisi u-Adv Mkhwebane akakaze azinze kahle.
Uthe ubona sengathi uMvikeli woMphakathi uyamsinda umsebenzi wakhe wengeza ngokuthi akaboni ezoliqeda ihlandla lakhe.
“Ubonakala sengathi uzoba namaphutha amaningi. Enye into emshayayo wukuthi unengcindezi njengoba engene endaweni ka-Adv Thuli Madonsela,” kusho uKhumalo.
Okhulumela i-EFF kuzwelonke, uMnuz Mbuyiseni Ndlozi, uthe sekucacile ukuthi u-Adv Mkhwebane akawazi umsebenzi wakhe waphakamisa ukuthi akehle esihlalweni.
UNdlozi uthe uMvikeli woMphakathi uzoyiqeda imali yabakhokhi bentela eyimosha ngamaphutha akhe kulesi sikhundla.
I-DA nayo ithe akehle esikhundleni yaphakamisa ukuthi akakhokhe nezindleko zenkantolo.