Kufufusa isiteleka embonini yensimbi
KUFUFUSA isiteleka embonini yabasebenza ngensimbi emuva kokuthi izingxoxo phakathi kweNational Union of Metal Workers SA (Numsa), abasebenzi abangamalungu ayo, ne-National Employers’ Association (Neasa) zifinyelele kwangqingqetshe ngesonto eledlule.
Esitatimendeni esithunyelelwe Isolezwe nguNksz Phakamile Hlubi obhekele ezokuxhumana kwiNumsa uthe abasebenzi bafuna ukunyuselwa amaholo ngo-15% kodwa umqashi akayizwa leyo.
Uthe bafuna kube nesivumelwano seminyaka emibili, abaqashi bangasebenzisi umthetho we-Minimum Wage othi abasanda kuqashwa kufanele bahole u-R20 ngehora ngoba embonini umuntu ofikayo uhola u-R40.
“INumsa izolinda kuze kube ngu-Julayi 15 ukuze sithole incwadi yethu yokuteleka ngoba abaqashi kabafuni ukunyusa amaholo ngendlela efanele. Yiphutha le-ANC, okuyiyo eyethula umthetho we-Minimum Wage, yingakho abaqashi bengafuni ukunyusela abasebenzi ngo-15%,” kusho uNksz Hlubi esitatimendeni.
Isikhulu esiphezulu seNeasa, uMnuz Gerhard Papenfus, sithe bakhathazekile ngemibiko engesiyo efafazwa yiNumsa.
Uthe akuhambi kahle embonini yabo futhi ngonyaka odlule kuvalwe izinkampani eziwu-500 kwadilizwa abawu-25 000.
“Imboni yensimbi iholela kahle uma kuqhathaniswa nezinye izimboni ezihlanganyele kwiBargaining Council. Siyathanda ukunyusa amaholo kodwa siyathanda nokucatshangelwa.
“INumsa mayingenzi sengathi ayazi ukuthi izinkampani ziyavalwa minyaka yonke futhi kudilizwe abantu. Sikhathazekile ngemibiko ethi sizokwehlisa imiholo yabasebenzi nokuthi asifuni ukubanyusela amaholo ngokulandela umthetho.
“Akusilo iqiniso ukuthi asifuni ukunyusa amaholo,” kusho uPapenfus.
Uthe akusilo iqiniso nokuthi abantu bazosebenza amahora amaningi ngaphandle kweholo kodwa abaqashi bebenze isiphakamiso sokuthi kwengezwe amahora amahlanu ngaphambi kokuthi kuqale i-overtime.
“INumsa iyazi ngalesi siphakamiso futhi ngeke sixhaphaze abasebenzi. Kuyingozi ukuthi iNumsa ivukuze abasebenzi ibatshele okungesiyikho ngoba ifuna bateleke. Uma sixoxa ngamaholo kufanele sonke sikhumbule ukuthi impilo yabantu nemisebenzi yabo isezandleni zethu kanjalo nokudala amathuba omsebenzi amasha,” kusho uPapenfus.