Sibusisekile ngomfundisi esamphiwa wuNkulunkulu
MHLELI: Ngithi angibonge ngokuba nomfundisi osemncane, uMfundisi Hadebe, kwisiZalo soThukela (Lower Thukela) .
Umfundisi uyawenza umsebenzi awuthunywe wuSomandla. Uma eshumayela kuyacaca ukuthi uyilungiselele intshumayelo yakhe. Uma usenkonzweni ephethwe nguyena kuyaye kufane nokuba sesikoleni ngoba uphuma kukhona okufundile. Ziningi izinto asesikhombise zona ebesingazazi futhi ebesingakaze sizicabange nokuzicabanga. Kuyajabulisa ukuba nomfundisi oshumayela kuze kudlule ihora lonke, ekhuluma into ezwakalayo.
Kuyathokozisa ukuba nomfundisi ongasabi ukukutshela kwezikabhoqo uma uyilungu lebandla eseliqala ukunhlanhlatha. Kuyajabulisa ukugcina kwakhe isikhathi senkonzo ngale ndlela enza ngayo. Izinkonzo zakhe ziqala noma indlu yesonto inomuntu oyedwa phakathi. Uyafundisana ukugcina isikhathi sokuqala kwenkonzo.
Ngiyamthanda ngokuba wumuntu ohlekayo, onomusa nothando kodwa ongalifihleli ibandla noma ilungu lebandla uma selibheda.
Bayaye babekhona abanye abaholi bama-society aseLower Thukela abake banhlanhlathe. UMfundisi Hadebe uyaye asukume aqondise lobo bugwegwe.
Kuyathokozisa ukuba nomfundisi ongashiywa yisikhathi owaziyo ukuthi intsha yamanje iphila kanjani. Kuhle-nje ukuthi enkonzweni umfundisi sewabakhulula abantu ukuthi abagqoke ngendlela abayithandayo inqobo-nje uma ihloniphekile. Uma kuza emculweni hhayi uhamba yedwa uMfundisi Hadebe. Iculo aliholayo ulihola kuze kube sengathi lingangabe lisaqedwa. Kuyathokozisa futhi nokuthi akazwani namaculo anensayo. Iculo laseWeseli alifuni vele ukuculwa lidonswe kodwa liyaphoqa ukuthi liculwe lisheshe ukuze kube lula nokuligidela. Ngiyaye ngichazeke uma esehola iculo, alihube, aligidele. Kuyaye kube sengathi singabuka yena esegida.
Ngicela wonke amalungu ebandla abambisane nomfundisi wethu. Ngiyamthanda nangokulwela amalungelo akhe.
Ngiyacela ukuthi abaholi bebandla ezindlini ezahlukene eLower Thukela bazame ukubuyisa amalungu ebandla angasezi endlini yokudumisa uSomandla. Bakhonyana bona abangasazihluphi ngokuza abanyamalala kusenomfundisi owayekhona ngaphambi kokufika kukaMfundisi Hadebe. Buyani makholwa amahle. Mduduzi Sibiya GROUTVILLE HIGH SCHOOL, KWADUKUZA