Uzibophezele ukukhulisa amabhizinisi abamnyama
Kungekudala izovula ihhovisi layo laseThekwini, eMhlanga.
Akusikho nje ukukhulisa izinkampani zabantu abamnyama kuphela okugqugquzela le nsizwa ezalelwe eBenoni, eGauteng kodwa izimisele ngokushintsha indlela abantu abamnyama abacabanga ngayo njengoba ithi kufanele bayeke ukuzitshela ukuthi kufanele bagcine ngokuba ngosomabhizinisi abancane.
“Uyabona thina sinomkhuba wokuthi uma ibhizinisi lakho selike langenisa u-R1million, uzibona sewusebenzile, angiphathi-ke uma like lafinyelela ku-R10million, usuke engasathintwa, umbone esehamba oDurban July. Thina sifuna abantu bazi futhi bakholwe wukuthi singabasiza amabhizinisi abo asuke ku-R10million angenise u-R100million futhi asuke nalapho angenise R1billion,” kusho uThembekwayo.
“Icala elikhulu elenziwa wubandlululo ukuthi labulala umdlandla wokuthi siphokophele, sifise izinto ezinkulu. Sifuna ukukushintsha lokho,” kusho uThembekwayo.
Nakuba begxile kosomabhizinisi asebethe ukuthuthuka kodwa bayabasiza nabasafufusa ikakhulukazi ngolwazi njengoba sebeqalile ukusungula izikhungo zokuthekela ulwazi lapho kufundisa khona ongoti, abanye babo abangosolwazi emanyuvesi. Lezi zikhungo zizogxila kakhulu ezindaweni ezisemakhaya.
“Isikhungo sethu sokuqala siseThohoyandou, eVenda. Lezi zikhungo zizofundisa nanoma ngabe ngubani ofisa ukuthola ulwazi oluzosiza ibhizinisi lakhe, sifundisa ngokuqasha abantu, ukuphathwa kwemali nokuzikhangisa. Kukhona izinkampani esisebenzisana nazo ezixhase lezi zikhungo.
“Ngesonto eledlule (emasontweni amabili) kade siseGreytown siyobheka isiza eMvoti. Lezi zikhungo sizenzela omama abaziphilisa ngokudayisa nanoma yimuphi omunye usomabhizinisi ofufusayo ngoba mina ngiyazazi ukuthi ngiwubani, ngiphumaphi nokuthi ngikhuliswe ngobani.
“Ngoba ngiwumuntu onamaphupho amakhulu, isifiso sami wukuthi sibe nesikhungo kubona bonke omasipala abangu-250 abakhona ezweni lethu,” kusho uThembekwayo.
Ezinkulumeni zakhe uThembekwayo uvamile ukugqugquzela abantu ukuthi bangakusabi ukusungula izinkampani
ezinkulu. Esinye sezibonelo avame ukusenza ngesokuthi izitokofela zingasungula ibhange njengoba zihlangana ngokonga imali.
Uma ekhuluma usho sengathi yinto elula kodwa iqiniso wukuthi akulula ngale ndlela asho ngayo ngoba miningi imidanti elawula izinkampani.
“Uqinisile ukuthi ngiyaye ngisho izinto sengathi zilula kodwa akunjalo. Umsebenzi wami njengengcithabuchopho wukuthi ngikhulume ngezinto, ngenze abantu babheke izinto ngelinye iso. Umsebenzi wami ukwethula isihloko esithile, uma sekwenzekile lokho, sekufanele sixoxe-ke ngokuthi senzanjani, sifinyelela kanjani kulokho, yimiphi imithetho okumele iguqulwe ukuze kwenzeke,” kusho uThembekwayo.
Ngonyaka uThembekwayo wethula izinkulumo kubantu abangu-350 000 emazweni angu-17 emhlabeni.
Nakuba ebalwa nabanye babantu abavelele kodwa uthi enye into emsizayo ohambweni lwakhe, wukwazi nokwamukela ukuthi imvamisa izinto azihambi ngendlela ofisa ngayo.
“Ngiyashesha ukuvuka ngizithuntuthe uma ngiwile futhi noma kuhamba kahle angijabuli isikhathi eside. Ngibe nenhlanhla yokuhlangana nabantu abangethembayo futhi abangigqugquzelayo. Enye into, ngihlale ngiphupha futhi nginezifiso ezinkulu ngoba into uma ukwazi ukuyibona ngamehlo engqondo, ingxenye yomsebenzi usuke usuyiphungulile.
“Enye into ngiwumuntu okhuthele ngendlela exakile. Angilona lolu hlobo lukasomabhizinisi olucabanga ukuthi ngoba inkampani ngeyakhe kusho ukwenza noma yikanjani, ngifika ngesikhathi emsebenzini, emihlanganweni, ngiyawuhlonipha umsebenzi wami,” kusho uThembekwayo.
Nakuba engusomabhizinisi kodwa uyavuma ukuthi akuyena wonke umuntu odalelwe ukuba ngusomabhizinisi.
“Sinenselelo eNingizimu Afrika yokuthi siyathanda ukuqamba izinto, kunoma-RDP, white monopoly capital, radical economic transformation, sisebenza ukuqamba nje kanti into abantu abayidingayo amakhono okusho ukuthi okufanele ngabe sigxila kukhona ukuphucula imfundo yethu, amakhono abantu abawatholayo bese abantu beyabona ukuthi bawasebenzisa kanjani, bazithuthukisa kanjani.
“Ukuba ngusomabhizinisi akulula, okokuqala nje iminyaka emihlanu yokuqala ulahlekelwa yizinto eziningi, kuqale kuphele umholo, ungenele emalini osuke uyibekile iphele, bese ungenela impesheni yakho. Ngakho-ke ngalesi sikhathi liqala lisimama ibhizinisi kufanele ubuyisele le mali ekulahlekele, le nto yabantu yokucabanga ukuthi ukuba ngusomabhizinisi kusho ukwenza imali kalula nesheshayo yinto engekho,” kusho uThembekwayo.