SIYOHLOLWA PHESHEYA ISIPHEKEPHEKE SE-WITS
UPHAKAMANI Mahlambi weBidvest Wits kuzophela leli sonto esePortugal lapho eyozama khona inhlanhla ngokusho komqeqeshi wakhe uGavin Hunt obesehaqwe yinjabulo emcimbini wePSL wokuklomelisa abenze kahle ngo-2016/2017.
Ngokuzwa kukaPotshoza uMahlambi (19), oshayele iWits amagoli ayishumi emidlalweni engu-27 kumasizini amabili, ophazanyiswe ukulimala, uzobe esePortugal amasonto amathathu kusukela ekupheleni kwesonto. UHunt obekubukwa yena kulo mcimbi kwazise iqembu lakhe lidle isicoco (obese kungesesine kuyena) akazange aphumelele ukuwaqagula ngamagama amaqembu azohlola uMahlambi kodwa kuzwakale sengathi ngeke libe linye.
Kulo mcimbi uMahlambi uqokwe njengomdlali omncane ovelele ku-Absa Premiership ngawo belu uMsombuluko. UHunt uthe uyozama inhlanhla uMahlambi hhayi ukuthi useyosayina.
“Simthumela ePortugal lingakapheli isonto. Uyozama inhlanhla. Sizombheka kahle uma esekhona ukuthi uqhuba kanjani. Sivumile ukuthi ake ayozwa ukuthi kunjani ukuziqeqesha nabadlali baphesheya kwezilwandle. Asazike ukuthi kuzokwenzekani kula masonto amathathu ezayo. Sizohlala kakhulu emkhulekweni mhlawumbe iNkosi isizwe bamthenge,” kusho uHunt.
NoJose Ferreira oyisikhulu kuZitshudeni ukuqinisekisile ukuthi uMahlambi uyahamba. Akuqali ukuthi uMahlambi amataniswe nePortugal, nangesizini edlule kuke kwavela ukuthi uya khona. Kuze kube yimanje iWits isisayinise uDaylon Claasen, Steven Pienaar, Bokang