Iyavuthwa ekaTeko ebheke kwiCape Town City
IYAVUTHWA indlela kaTeko Modise ebheke kwiCape Town City.
Emasontweni adlule kwabikwa ngodaba lukaJohn Comitis, usihlalo weCity, owayechaza ukuthi konke ngoModise kulele kuBenni McCarthy, ocija iqembu.
Ngeledlule silumane indlebe nemenenja kaModise, uJazzman Mahlakgane, eqinisekisile ukuthi iCape Town City ngelinye lamaqembu abaxoxa nawo.
NgoMsombuluko ebusuku emiklomelweni yePremier Soccer League (PSL) eSandton Convention Centre, uMahlakgane uveze ukuthi maningi amathuba okuthi uModise ajoyine iqembu elizinze ngaphandle kwaseGauteng.
UModise akazange ayivuselele inkontileka yakhe neMamelodi Sundowns abesehlale kuyo kusukela ngo2011.
“Maningi amathuba okuthi uTeko uzodlalela iqembu langaphandle kwaseGauteng ngesizini ezayo. Akuseyona imfihlo manje ukuthi uTeko uxoxa neCape Town City,” kusho uMahlakgane.
UModise udlalile noMcCarthy kuBafana.
UModise, oke wanqoba umklomelo womdlali ovelele amasizini amabili elandelana kwi-Absa Premiership, ukubeke kwacaca ukuthi usafuna ukudlala amanye amasizini amabili. “Angilona uhlobo lomuntu oluthanda ukuhamba lukhuluma ngodaba lomdlali izingxoxo zibe zisaqhubeka. “Njengamanje iCity noTeko basaxoxa. Uma sebeqedile ngizobe sengiyangenelela. Okwamanje akukaqedwa lutho,” kusho uMahlakgane. UComitis okuke kwavela ukuthi uphesheya akatholakalanga ukuphawula, ucingo lwakhe beluvaliwe. ICity isisayinise u-Ayanda Patosi obegijima kwiLokoren yaseSweden ngesizini edlule. Phakathi kwabadlali abanonhlonze ababoshelwe yiqembu nguLebogang Manyama owenze ezibukwayo emiklomelweni yePSL no-Aubrey Ngoma bobabili abafunwa uthuli yiMamelodi Sundowns. NgoJanuwari iSundowns ibifuna uMichael Essien waseGhana.