Kumsebenzele ukuba seKapa
INDAWO yaseKapa akuyona indawo ewubukhazikhazi njengaseGoli naseThekwini. Nesimo sezulu akusona lesi esijwayelekile ngoba lihlale lina noma kunomoya onamandla.
Izakhamuzi zakhona eziningi zikhuluma ulwimi lwesiBhunu nesiXhosa. Lezi zinto zenza impilo ibe nzima uma uqhamuka kwesinye isifundazwe futhi yingakho uLebogang Manyama (26) weCape Town City ehlale enza kahle uma edlala emaqenjini aseKapa ngoba asikho isikhathi sokuzijuxuza.
NgoMsombuluko ebusuku uManyama wenze ezibukwayo emiklomelweni yePremier Soccer League eSandton Convention Centre.
Uqokwe njengomdlali ovelele kwiAbsa Premiership wamuka no-R250 000. Uphinde wahlomula ngomklomelo womdlali ovelele ovotelwa ngabadlali bamaqembu adlala kwiPSL wathola u-R150 000. Isiyonke imali etholwe nguManyama kube ngu-R425 000 njengoba ehlomule nango-R25 000 ngokuba ngumdlali oshaye amagoli amaningi emidlalweni yeligi. Uhlohle angu-13.
Ekhuluma nabezindaba ngemuva kokuwola imiklomelo udalule okwenza abe nguqanduqandu uma edlala eKapa.
“IKapa yindawo enhle kodwa enesizungu. Lokhu kuyasiza ngoba uyakwazi ukugxila emsebenzini wakho azikho ezinye izinto ezikuphazamisayo. Uma kungisebenzela (ukuhlala eKapa) kungani kumele ngishintshe indawo,” kusho uManyama ofunwa yiMamelodi Sundowns ePitoli.
UManyama kuke kwavela ukuthi akaziphethe kahle uma engadlali ngesikhathi esagijima kwiSuperSport United kumasizini amabili adlule.
“Ngifuna ukubonga kuMuhsin Ertugral. Ngesikhathi engifonela ethi ufuna ngizodlala kwiMpumalanga Black Aces ngangikade ngihlezi isikhathi ngilimele. Lolo suku lwayishintsha kakhulu impilo yami. Ngenze inqwaba yamaphutha ngaphandle kwenkundla ngisekwiSuperSport. Manje sengikhulile futhi amaphutha angenze ngawubuka ngenye indlela umsebenzi wami. Empilweni awuhluleki kodwa uyafunda,” kusho uManyama.
Uthe kuyamgqugquzela ukuzwa ukuthi kukhona amaqembu amfunayo.Ngesizini entsha uzocijwa nguBenni McCarthy osanda kuqashwa yiCity.
“Sinenhlanhla ngokuba yisizukulwane sokuqala esizoncela ulwazi kwingwazi efana noBenni McCarthy. Kuningi esizokufunda kuyena. Udinga ukunikwa ithuba. Asingamqhathanisi noZinedine Zidane (ocija iReal Madrid), uZidane unguZidane futhi uBenni unguBenni. Asilinde kuphele isizini bese siyamehlulela,” kusho uManyama.
Ngesizini ezayo iCape Town City izodlala kwiCaf Confederation Cup.
“Umqhudelwano omkhulu kodwa kumele siqaphele indlela esiwuhlelela ngayo ngoba ungagcina usiphazamisa emidlalweni yeligi njengoba siyiqembu elinesikwati esincane,” kusho uManyama.