Kuyathusa okushiwo nguJordaan
ILAHLISA ngethemba inkulumo kamengameli weSouth African Football Association (Safa) uDanny Jordaan ngokuba yingxenye kweBafana Bafana kowe-African Nations Championship (CHAN) ezokuba ngasekuqaleni konyaka ozayo eKenya.
Kuzokuthi ngeSonto iBafana ivakashele eFrancistown lapho iyoshukana khona neBotswana kowomlenze wokuqala wokuhlungela ukudlala kuCHAN ngonyaka ozayo. Umlenze wesibili useMoruleng Stadium ngoJulayi 22.
Ngempelasonto edlule uJordaan uthe, ukube kuya ngaye ngabe iBafana ayizihluphi nangokuyidlala eyokuhlungela iCHAN ezokuba ngoJanuwari ka-2018 eKenya ngoba umthwalo wokuba yingxenye yalo mqhudelwano uzoba mkhulu kakhulu.
Abezeseka ngakho uJordaan wukuthi lo mqhudelwano odlalwa abadlali abazinze emaligini asekhaya awukho ngaphansi kwekhalenda leFifa. Ngalokhu lo mengameli ubona kuzophinde kube nezinye izinkinga uma sekufanele kuqokwe isikwati ngoba amaqembu ngeke avume nabadlali bawo.
“Ngenxa yezinkinga eziningi, uma siphumelela ukuzibekisela indawo kuCHAN ngonyaka ozayo sizohambisa abafana abadlala ku-ABC Motsepe League ngoba abanye ngeke sibathole,” kusho uJordaan eSafa House ngeSonto.
Kukhala umengameli nje, umqeqeshi uStuart Baxter nemenenja yeBafana, uBarney Kujane bahambe baze baba bafushane bencenga amaqembu ukuba abadedelele abadlali abangabadingi kangako njengoba wonke amaqembu eqala amalungiselelo okuqala kwesizini.
Nesikwati esimenyezelwe izolo sikwenza kuhlale obala ukuthi iBafana izoya kulo mdlalo weBotswana ngesikwati esihluke kakhulu kunebesikuCosafa Castle Cup muva nje kepha kugqishe abadlali abasathungatha amakhaya nabangadingeki kangako emaqenjini abo.
“Ngifunde okuningi kuCosafa ngabadlali abancane futhi ngikubona njengelinye ithuba lokubafunda futhi nengingabazi kuCHAN. Okuzoba wumqansa ukuthi kuzofana nokuthi siqala phansi kulokhu ebese sikwenzile nebesesikufundile kuCosafa,” kusho uBaxter.