‘Ubehlale emamatheka uChikapa’
NGESIKHATHI KUVELA NgeSonto ukuthi uRay Phiri ubambekile, angicabanganga ukuthi sekungase kumenele maduze.
Ngishayele zombili izinombolo zakhe zocingo zangena kwivoice mail, yena engatholakali. Ngikhumbule usuku engahlangana naye ngalo ngo-2007 ePlayhouse eThekwini, belungiselela ikhonsathi lokugubha iminyaka engu-25 kwasungulwa iStimela.
Ngenxa yokuba ngumbhali wezikaqedisizungu nomlandeli waleli qembu, ngenza konke okusemandleni ukuba nengxoxo noRay obengumholi ophambili. Ngithola umbiko wokuthi singabonana naye lapho bezozilolongela khona ePlayhouse, ngacela ukuphelezelwa uzakwethu ongasekho, owayengumlandeli wokuqina weStimela.
Ngangifuna isibindi ngoba ngesaba ukuhlangana nale ngqalabutho ngingazi ukuthi izongithatha kanjani. Safika ePlayhouse uRay esejuluke emanzi nezakhe bezilolonga. Sahlala ezihlalweni eziphambili sibukela. Bazilolonga isikhathi esingangehora, ngagcina ngizizwa ngisekhonsathini. Wawungeke usho ukuthi bayazilolonga kodwa kwakungathi sebeyababona abalandeli, ekubeni kuyimina nozakwethu kuphela izibukeli. Zonke izingoma ezazishaywa uRay zazihambisana nokulinganisa ngezandla nangomzimba lokhu okushiwo yiculo.
Uma ethi ushova ingolovane wawuyibona eyishova ngempela. Imidanso yakhe adume ngayo yangihlaba umxhwele, ngimangaliswa nawumfutho anawo nozakwabo uNana ‘Coyote’ Motijoane naye ongasekho.
Engakuqaphela wukuthi yize uRay ebengumholi eqenjini, wayelalela konke okushiwo ngumdidiyeli esiteji.
Sihlangana naye nje emuva kokuzilolonga sekuyacaca ukuthi usekhathele kodwa weza kithina emamatheka. Wayehamba kancane, egqoke isikibha esikhathele esinsundu, ijini ephuphile nezicathulo zokuswenka. Lokhu kumamatheka ngakubona yaze yaphela ingxoxo yethu, ephendula yonke imibuzo ngezwi eliphansi.
Ngikhumbula ukuthi ngangilokhu ngimbiza ngobaba ngenxa yokuhlonipha iminyaka, waze wakwenza ihlaya lokhu engikhumbuza ukuthi yena ubizwa ngoBra Ray. Ngambona ehlukile kwamanye amaciko akhathazeka ngesikhathi uma unengxoxo nawo. Waba naso sonke isineke kwaze kwaphela imibuzo.
Akahluphanga nangokunqaba ukushuthwa yize ayengekho esimeni sokuvela emaphephandabeni. Uzakwethu owayeshutha wamenzisa zonke izitayela, elokhu emamathekile uRay. Kuyo yonke ingxoxo wayegcizelela ukuthi ukuhlonipha umculo nabalandeli yiyona mfihlo emenze waphumelela emculweni. Ngashaywa oluncane uvalo sengifuna ukucela inombolo yocingo.
Akazange ahluphe, kunalokho wanginika zambili enzela ukuthi ngimthole uma ngimdinga. Bekuthi uma ngimshayela ngomsebenzi, ngiqale ngimkhumbuze ngokuhlangana kwethu ePlayhouse ukuze asheshe angamukele.
Ngaphatheka kabi ukuthi ngaxinwa wukugula ngosuku lwekhonsathi, okwenza ngayishiya phakathi. Engakujabulela ukuthi base beyishayile ingoma ethi Where Did We Go Wrong okwaba sengathi uyahlanya, edansa aze adunuse ecokama kungathi uyisigoga.
Yize ebesekhulile kodwa ukushona kwakhe kwenze ngabona sengathi ushiye i-Unfinished Story ngoba bengisawuthanda umculo wakhe.