URay Phiri uyibekile induku ebandla
NGIZWE obukhulu ubuhlungu ngokudlula emhlabeni komunye wabaculi ebengibakhonzile, uRay “Chikapa” Phiri. Ngesikhathi ngizwa ukuthi uRay Phiri ungomunye wabaculi abazobe benandisa kwiJazz in July, ngazitshela ukuthi noma ikanjani kumele ngiye kulo mcimbi. Inhloso enkulu yokuwuhambela kwakungukubona lo mculi ongikhumbuza ngezikhathi zakudala ngisakhula elokishini, eMlaza. Ngaya kulo mcimbi kodwa ngahamba sengiphatheke kabi njengoba agcina engafikanga. Ngangilokhu ngibuze njalo ukuthi kanti ungena nini. Ngaliphonsa ithawula ngesikhathi kungena uRingo elandelwa uThandiswa. Isikhathi sasingasekho, okwavele kwahlala obala ukuthi uRay akekho. Akuphelanga sikhathi esingakanani ngezwa kuthiwa akafikanga ngenxa yokuxinwa ukugula. Ngesinye isikhathi uma kuthiwa umuntu uyagula uyaye uzitshele ukuthi yinto edlulayo, naye bengingalindele ukuthi useyahamba. Bengiqala ukuzwa ngokugula kwakhe. Uma ngicabanga ngoRay Phiri bengivele ngikhumbule uKansas City, owayethi uma ebongela iStimela athi ngoSbali baselokishini. Kunesikhathi lapho ayezocula khona eMlazi Cinema, kwakudume yonke indawo ukuthi bayeza oSibali baselokishini. Ngo-2007 ngibe nenhlanhla uMnuz Sbu Mpisane, owayeyimenenja yeStimela, engixhumanisa noRay Phiri. UMpisane wangethula emalungwini eStimela wonke kodwa ngazithola ngichitha isikhathi esiningi naye uRay ngimlandisa ngothando enganginalo ngeStimela. Ngamtshela nje iqiniso ukuthi yize ngiyintatheli kodwa ngingumlandeli omkhulu womculo wabo. Sagcina sikhuluma nangezingoma engizithandayo, ikakhulu eyayithi, Whispers In The Deep, saphinde sakhuluma nangoTeaspoon Ndelu owayeshaya isaxophone kwazise kwakungumuntu onesibongo esifana nesami. Ngemuva kwalokho sasesixhumana kalula naye. INingizimu Afrika ilahlekelwe ngokuwa kwale nsika, iyibekile induku ebandla.