Kukhalwa nxazonke ngokushona kukaPhiri
KUKHALWA nxazonke ngokudlula emhlabeni kwengqalabutho yomculi, uRay “Chikapa” Phiri, oshone entathakusa yayizolo esibhedlela saseNelspruit.
URay kuvela ukuthi ungeniswe esibhedlela emasontweni amabili esexinekile kodwa wanxusa umndeni wakhe ukuthi ungabikeli muntu ngalolu daba njengoba engafuni kukhathazeke abaningi.
Amaqembu epolitiki, abaculi, nabalingisi badlulise amazwi enduduzo emndenini nakubalandeli.
USipho ‘Hotstix’ Mabuse, owasebenza kakhulu noRay, uthe kusenzima ukukhuluma ngalolu daba ngoba yena uzwe ngokukukaRay ngesonto eledlule.
“Bengingabhekile ukuthi usengadlula emhlabeni ngokushesha okungaka. Bengisondelene naye futhi sisihloniphile isicelo sakhe sokuthi akungaziswa muntu ngokugula kwakhe kodwa besingabhekile lokhu osekwehlile,” kusho uHotstix.
Uthe uRay ubengumuntu onolwazi oluningi oluthinta umculo ngisho ezombusazwe.
“Ngigcina ukukhuluma naye sasibheka isimo sezwe sikhuluma ngendlela eliyiyo. Konke ayekusho wawubona ukuthi ulwazi unalo. Ubenothando futhi ngomsebenzi wakhe womculo.”
Uthe ubesengene kakhulu ekusizeni intsha efuna ukungena emculweni.
“Silahlekelwe futhi ngithokozile emphefumulweni wami ukusebenza nomuntu ofana naye.” Umculi uJoe Nina uthe uRay ubefana nomfowabo bake baze baba nenkampani bobabili besebenzisana kuyo.
“Nangesikhathi esehamba eyosebenzela eGoli ubuhlobo bethu abuzange buphele. Ngihluleka nokuchaza indlela abeyiyo kodwa ngithi nje aphumule ngokuthula nomndeni wakhe ududuzeke.” Uthe ngeke lilibaleke kalula igama likaRay. URingo Madlingozi uthe iNingizimu Afrika ivuke ngezindaba ezimbi zokudlula kukaRay.
“Ngamgcina ezinyangeni ezintathu ezedlule ekhuluma ngothando nokuzinikela anakho emculweni. Kubuhlungu,” kusho uRingo.
Umlingisi uThembi Mtshali-Jones uthe ziyashaqisa gula izindaba zokudlula kukaRay obekusanda kuvela izindaba zokuthi uyagula. “Yizindaba ezibuhlungu lezi. URay womunye wezingqalabutho esingeke sizikhohlwe. Alale ngokuthula. Siyabonga ngomculo asenzele wona.” I-EFF, Cope, IFP neNFP badlulise amazwi enduduzo ngokudlula emhlabeni kukaRay. NoNgqongqoshe ophethe uMnyango wamaSiko namaCiko kuzwelonke, uNathi Mthethwa, uzwakalise ukudumala ngokudlula emhlabeni kukaRay. “Siyohlala sizikhumbula izingoma zakhe ezifana nethi People Don’t Talk Let’s Talk, Whispers In The Deep nethi Zwakala. Kusithuse kakhulu ukudlula kwale nsizwa futhi sidabukile.”