UMboro usola ikhomishini ngesithunzi
USABISA ngokubopha ikhomishini ebiphenya abefundisi umphrofethi odume eGoli ngokwenza izimangaliso, uPaseka Motsoeneng odume ngelikaMboro we-Increadible Connections.
UMboro uthi wehliswe isithunzi okuyingakho namuhla ethe uzobonana nabameli bakhe ukuze abophe le khomishini evikela iNkolo, iziLimi namaSiko.
Igama lakhe belilokhu livela njengabanye babaholi abadinga ukuphenywa njengoba kusolwa ukuthi badukisa abantu ngezimangaliso nangokudayisa imikhiqizo abathi iyaphilisa.
Eziphendulela uMboro, uthe akakushayi mkhuba konke okushiwo yikhomishini. Uyisole ngokubandlulula abefundisi bamabandla esimanje, ekubeni izinyanga nezangoma zenza okufanayo kodwa aziphenywa.
“Njengoba ikhomishini ikhala ngabefundisi abafunza abantu izinyoka, nezinyanga ziyabafunza zona nemithi. Kade zaqala ukudayisa imithi kodwa aziphenywa ngoba vele kuliwa nabefundisi. Ngizobopha ikhomishini ngoba inamanga futhi ingehlise isithunzi emphakathini. Angiyanga kwikhomishini ngoba ayinalo ilungelo lokungibizela kuyo nokungibopha. Uma beyinelungelo ngabe kade waboshwa uPastor Chris naye ogcine eya enkantolo,” kuchaza uMboro.
Uthe akasoze ayikhokhe intela ngoba imikhiqizo yakhe uphilisa ngayo abazalwane, yibona abanikelayo ngoba besindile.
Mayelana necala avulelwa lona, uthe walubeka uhlangothi lwakhe emaphoyiseni. Usabise nangokuthi uzoduba lonke usizo lwakhe emphakathini ukuze umeseke, ulwe nekhomishini ezohlukanisa amabandla.
Ikhomishini yamvulela icala ngemuva kokungaveli phambi kwayo nyakenye. Umbiko wekhomishini okhishwe ngoLwesibili, uphakamise ukuthi amabandla nabefundisi abadayisa imikhiqizo kumele akhokhe intela.
UNkk Thoko MkhwanaziXaluva, onguSihlalo weKhomishini, uthe abanankinga neminikelo emabandleni kodwa bafuna kuphenywe abadayisa imikhiqizo.
“Wonke umuntu onebhizinisi kuleli uyayikhokha intela. Abefundisi sebedayisa imikhiqizo, yingakho sifuna abakwaSARS babaphenye. Amabandla abhaliswe njengezinhlangano ezingenzi nzuzo kodwa uma edayisa imikhiqizo efaka imali, kumele akhokhe intela.”
Uthe sebehlanganile nabakwaSARS okuyibo abazobona ukuthi baqala kuphi kodwa konke lokhu kuzokwenzeka uma iPhalamende seliziphasisile izincomo zekhomishini.
Mayelana nabefundisi abavulelwa amacala ngenxa yokungahloniphi ikhomishini, uNkk Mkhwanazi-Xaluva, uthe bazobhalela uNgqongqoshe wamaPhoyisa ukuthola ukuthi amacala aphelelaphi. Kulaba befundisi kubalwa uPastor Chris Oyakilome, Mboro noPastor Samuel Radebe weRevelation.
Ikhomishini, ithe bonke abangahambisani nombiko banelungelo lokuya enkantolo. I-Alliance of Pentecostal and Charismatic Churches in SA nayo ithe izowuphikisa umbiko.