Usinde esethelwe ngophethroli ozithwele
UMPHAKATHI waseSundumbili eMandeni ukhathazekile ngesizinda okusolwa ukuthi ngesezidakamizwa, abahlala kuso okuthiwa bashaye owesifazane okhulelelwe bambhunyela nangophethroli.
UNksz Fanele Dube (23), onamasonto ayisikhombisa ekhulelwe, ubonga owesilisa omsize ngokumlamulela ngeSonto ngesikhathi ehlaselwa ngabesilisa abathathu abaziwayo endaweni. Lo wesifazane ovele wangena ezinsukwini zakhe wopha kusuka eshayiwe, ulaliswe esibhedlela ngeSonto waphuma ngoLwesibili.
“Bekuyizithuba zawo 1 emini ngiphuma esitolo. Kuthe sengidlula ngakule ndawo eseduze nasethaveni, ehlala igcwele nabafana ababhemayo ngacela kwengibabonile ukucosha amakopi. Bengicoshela umama ngoba uyawaqoqa bese ethola imali ngawo,” kuchaza uNksz Dube.
Usola ukuthi laba besilisa bebephuzile ngoba amakopi abecela ukuwacosha bekungawotshwala.
“Bavele basuka bangithuka bathi ngiyazitshela, ekubeni ngiqale ngababingelela ngacela kahle. Bangishayile bengikhahlela esiswini noma sengilele phansi. Omunye ungene kule ndlu ababhemela kuyo, wabuya nophethroli bangibhunyela ngawo. Kusize ubhuti obedlula ofike wangilamulela bangiyeka,” kusho uNksz Dube.
Uphuthunyiswe emtholampilo wafakwa idriphu, bathola nokuthi uyopha. Udluliselwe esibhedlela esaqhubeka nokopha, wadedelwa ngoLwesibili.
UNksz Dube uthe bamhlolile bathi ingane ayiphazamisekanga esiswini kodwa usaqhubeka nokopha. Uthi usaphethwe yizinhlungu ekhanda nasenhlafunweni lapho eshaywe khona.
Izolo ubeye emahhovisi osonhlalakale njengomyalelo wasemtholampilo kodwa wangafica muntu.
Uthe usenovalo njengoba abasolwa bengaboshiwe, ekubeni bayamazi endaweni. Okhulumela amaphoyisa KwaZulu-Natal uColonel Thembeka Mbhele, uthe kuphenywa icala lokuhlukumeza elivulwe ngowesifazane. Abasolwa abathathu basagcwele izintaba. Kuthiwa sekungenelele ikomiti lomphakathi ukubathungatha kodwa akwaziwa ukuthi bahlalaphi.
UNkk Molly Ncwane osekomitini lomphakathi ku-wadi 14, uthe bakhathazekile ngalesi sigameko.
“Siyasazi lesi sizinda okuhlala kuso abafana ababhemayo kodwa sinenkinga yokusiqeda. Sazama ukulandela nekhansela kodwa akucaci ukuthi lo muzi abahlala kuwo okabani. Nathi sesiyasaba uma sebezoshaya abesifazane, esingazi ukuthi bebezomenzani ukube akalanyulelwanga,” kusho uNkk Ncwane.
Uthe uzohlangana nekhansela babone ukuthi basizana kanjani nomphakathi ukuqeda lesi sizinda.