Kunamagatsha aseKZN angakanqumi ukuthi azoseka bani njengomholi
SEKUVELE ukuthi kunamagatsha KwaZulu-Natal angakanqumi ukuthi azoseka bani phakathi kukaDkt Nkosazana Dlamini Zuma nePhini likaMengameli uMnuz Cyril Ramaphosa phezu kokuba i-ANC isiyivulile inkundla yokuthi sekungaxoxwa ngamagama.
Isolezwe lithole ukuthi kuhlukene imibono emagatsheni ukuthi azoseka bani phakathi kwalaba baholi njengoba kuyiwa engqungqutheleni eNasrec eGoli ngoDisemba.
Ukuphakanyiswa kwamagama kuzovulwa ngokusemthethweni ngoSepthemba. Yize i-ANCYL KwaZulu-Natal isiphumele obala ukuthi yesaka uDkt Dlamini Zuma kodwa leli phephandaba lithole ukuthi kunokwehlukana phakathi.
Ilungu lesigungu esihola i-ANC KwaZulu-Natal uNksz Nentembeko Boycee ngesikhathi lithula inkulumo yalo egameni lobuholi besifundazwe engqungqutheleni yemigomo yesifunda iTheku, lamemezela ukuthi iKZN yeseka uDkt Dlamini Zuma. Kodwa lesi simemezelo ngeke sithathwe njengesisemthethweni ngoba isimemezelo salolu hlobo kumele senziwe nguNobhala okunguMnuz Super Zuma noma nguSihlalo uMnuz Sihle Zikalala.
Amanye amalungu emagatsheni ehlukene e-ANC esifundazweni akhulume neSolezwe kodwa acele akungadalulwa ngoba awavumelekile ukukhuluma nabezindaba, aveze ukuthi abengakaxoxi ngokuthi azoseka bani.
“Mina njengami lapho ngikhona kunemizwa eyahlukene kodwa njengegatsha besingakanqumi ukuthi sihamba nobani,” kusho elinye ilungu.
Elinye laseMalahleni lithe lihamba noRamaphosa kodwa lathi igatsha belingakanqumi.
UNobhala we-ANC eLower South Coast uMnuz Mzwandile Mkhwanazi uthe isifunda sabo besingakanqumi ukuthi sizoseka bani. UNobhala wasoKhahlamba uMnuz Sipho Hlomuka naye uthe bebengakayixoxi le ndaba.
EMusa Dlala ilungu lakhona lithe igatsha labo selixoxile bavumelana ngokuthi bahamba noDkt Dlamini Zuma. ITheku okuyisifunda esikhulu se-ANC eKZN linama-ward angu-110 kanti ngokwesifunda belinqume ukuthi lihamba noDkt Dlamini Zuma.
Yize kunjalo kodwa akhona amagatsha anabaholi abaziwayo ukuthi bahamba noRamaphosa, iningi lawo ilawo akade ehamba neMeya yaseThekwini ephumile uMnuz James Nxumalo noMnuz Senzo Mchunu obenguNdunankulu waKwaZulu-Natal.
UMchunu osebonakale kaningi ehambisana noRamaphosa emicimbini ehlukene eKZN, ngoLwesibili nayizolo kusabalele ezinkundleni zokuxhumana ukuthi uzobe ethula inkulumo kwi-ANCYL Cadres Forum eShingwedzi College, eLimpompo, ngoJulayi 15. Ilungu le-ANC esiShayamthetho KwaZulu-Natal lithe kwasona isifundazwe sizoya engqungqutheleni sihlukene phakathi.
“ELower South Coast, eNkosi Bhambatha, oKhahlamba ngisho naseFar North lapho amagatsha amaningi khona kade ehamba noSenzo Mchunu, lawo magatsha manje asehamba noRamaphosa,” kusho leli lungu.
Lithe kwayona i-ANCYL eKZN ihlukene phakathi.
Imizamo yokuthola uNobhala we-ANC KwaZulu-Natal uMnuz Super Zuma noMkhulumeli wayo uMnuz Mdumiseni Ntuli ayizange iphumelele izolo, ucingo lukaZuma belukhala lungabanjwa olukaNtuli belungangeni.